2 gipusil patay sa wa ilhing kriminal

CEBU, Philippines - Duha ka lalaki ang patay human pusila sa wala hiilhing mga tawo sa managlahing lugar sa lungsod sa Balamban sa miaging adlaw.

Ang mga nakalas naila nga si Danilo Sepada, 28, ulitawo, molupyo sa Barangay Matab-ang ug ubos sa probation sa kasong murder, ug Joel Medalla Barbon,  33, drayber sa traysikad  nga  taga sitio Katunggan, barangay  Pondol.

Si Sepada kinsa  gidudahang  drug  pusher didto pusila  sa  sitio Luwas-Tapon,  barangay Arpili sa alas 3:00  sa kaadlawon. Samdan  siya sa nagkadaiyang parte sa iyang lawas nga maoy hinungdan sa iyang kamatayon. 

Matud pa nga gibadlong sa iyang igsoon ang biktima nga dili moadto sa ngitngit nga dapit apan nagmagahi ang biktima ug miadto gyud sa maong lugar. Ang mga  silingan sa biktima nakadungog  og mga buto sa pusil sa mga alas 3:00 sa kaadlawon.

Napalgan na lang ang patay nga lawas sa biktima sa iyang mga silingan sa alas 6:00 sa buntag nga nagbuy-od na sa yuta. Wala isalikway sa kapolisan nga mga tawo nga may kalagot sa biktima ang responsabli sa iyang kamatayon. 

Samtang  si Barbon didto  ra sa sulod  sa iyang  balay  pusila sa pugakhang  samtang natulog kini    sa alas 7:00 sa imaging gabii. Matud pa nga ang nagpusil sa biktima usa ka lalaki nga nagtaptap sa iyang  nawong, nagsul-ob sa kolor puwa nga t-shirt, nag-short.

Human  maigo  ang  biktima midagan  dayon  pahilayo  sa maong  lugar  ang kriminal.

Matud pa ni SPO1 Jose Villarino nga nahinabi sa The Freeman/Banat News nga wala gyud  mailhi  ang  mga  criminal    tungod  kay  walay  nakakita niini. Walay narekober ang kapolisan sa crime scene bisan usa ka kabhang sa bala nga gigamit sa pagpusil sa biktima. Matud ni Villarino nga dumot ang ilang gitan-aw nga labing duol nga motibo sa pagpusil patay sa biktima nga gihulagway nga police asset.  (BANAT NEWS)