Dul-an sa 20 ka tawo patay sa Cebu

CEBU, Philippines - Dul-an na sa 20 ka tawo ang patay ug upat ang missing human gikuso-kuso sa super typhoon Yolanda ang lalawigan sa Sugbo sa miaging adlaw.

Matud pa sa Philippine Information Agency sa Twitter Account niini nga sa dakbayan sa Bogo dunay say unom ka mga tawo ang namatay. Nahunlak sab ang usa ka mall sa dakbayan sa Bogo ug grabi ang kadaot nga naangkon sa bus terminal niini ug sa mga kadalanan. Samtang tulo ka patay’ng lawas ang napalgan nga naglutaw sa kadagatan sa managlahing lugar nga gituohang naanod gikan sa sapa ug gibanlas ngadto sa dagat  atol sa pagkusokuso sa bagyong Yolanda sa lalawigan sa Sugbo niadtong miaging Biyernes sa buntag.

Ang unang patay’ng lawas napalgang naglutaw sa daplin sa kadagatan sa Mulle Osmeña sa barangay Poblacion, dakbayan sa Lapulapu alas 6 pasado ang takna sa buntag kagahapon.

Si PO1 Jade Querobin sa homicide section sa Lapulapu City Police Office (LLCPO) miingon nga sa bulsa sa gisul-ob nga short pants sa maong babaye maoy ilang nakuha ang voter’s ID nga nagdala sa pangalan nga Rosario Alarba Elcarte, 60, taga Salinas Drive , Lahug sa dakbayan sa Sugbo, apan wa pa masuta kun ang naa sa ID mao ba gyud ang patay’ng lawas.

Samtang sa Canhabagat sa lungsod sa Medellin laing duha ka patay’ng lawas sa babaye ang napalgan sa pagatpatan ug 10- ka metros gikan sa duha laing patay’ng lawas sa usa ka lalaki usab ang napalgan.

Si Insp. Fructouso Lim, hepe sa lungsod sa Medellin miingon nga walay nakaila sa mga molupyo sa maong dapit  ug gituohang naanod ra sila didto atol sa pagbunok sa bagyo.

Si Insp. Alexander Ancao nga nahinabi sa The Freeman/Banat News nagkanayon nga sa lungsod sa San Remegio dunay duha ka mga tawo ang nakalas ug duha ang missing sa maong lugar.

Sa Facebook Page sa kanhi kongresista Atty. Pablo John Garcia miingon siya nga nanawag kaniya ang mayor sa Bantayan nga 90% sa lungsod niini ang naharos sa bagyo ug dunay pito ka mga tawo ang nakalas.

Hangtud ning pagsuwat sa balita, wala pa gihapon hingpit nabalik ang kuryente ug komunikasyon sa Northern Cebu.

Ang panginahanglan sa pagkaon ug tubig lakip na mga tambal ang nag-unang gipangayo karon sa mga biktima sa maong bagyo sa maong bahin sa Sugbu. (BANAT NEWS)