Lima ka barko nangasangad sa Cebu ug Bohol

CEBU, Philippines - Lima ka mga barko ang nakasinati og problema samtang sila gi-angkorahe diha sa kadagatan sa Talisay City ug sa Mactan Channel atol sa paghapos sa mga dagkong balod bunga sa bagyong Yolanda kagahapon.

Matud pa ni Philippine Coast Guard-Central Visayas commander William Melad nga ang nasangad mao ang M/V Schelde Trader usa ka foreign vessel nga nagbase sa Netherlands.

Nagkanayon si Melad nga ang maong barko ni angkorahe sa Lawis Ledge tungod sa bagyo apan naanod kini tungod sa kusog nga balud nga maoy hinungdan nga nasangad kini.

Samtang  duha ka barko nga nag-angkorahe sa Gothong Wharf sa Mandaue City ang nakabuhi gikan sa pagkagaid niini tungod sa kakusog sa balod.

Ang duha ka barko mao ang M/V Ozamis Bay 1 ug M/V Cagayan Bay 1. Hinuon, matud pa ni Melad, ang tulo ka mga barko wala ra nakaangkon og kadaot ug dali ra silang napugngan ug napahimutang. Samtang duha ka mga barge sa Guindulman, Bohol ang nasangad tungod sa dagkong bawod. Ang duha ka mga barge nga napadpad sa baybayon ang Barge Big Champ ug Barge Roger.

Naluwas hinuon sa mga sakop sa Philippine Coast Guard ug sa mga sakop sa Search and Rescue team sa Bohol Provincial Police Office ang mga tripulante.

Sa laing bahin, suspendido pa gihapon ang biyahe sa tanang barko padung o pagawas sa Sugbo karong adlawa sumala pa ni Melad hangtud nga di libkason ang storm warning signals sa Central Visayas. "As soon as PAGASA will lift warning signals, pwede na nating payagan na mag travel ‘yung mga barko," dugang pa ni Melad. Samtang gikanselar kagahapong adlawa ang tanang domestic flights sa Mactan Cebu International Airport human wala tuguti ang mga airline companies nga mobiyahe ang ilang mga eroplano tungod sa bagyo. (/EIM) (BANAT NEWS)