Super typhoon Yolanda

CEBU, Philippines - Ang bagyo nga Yolanda gipaabot nga mokuso-kuso pag-ayo sa tibuok Sugbo karong hapon hangtud na sa gabii Biyernes bisan og ang katawhan nakasinati na og subsob nga pag-uwan ug kusog nga hangin pagkakaron.

Matud ni Oscar Tabada, ang pangulo sa Philippine Atmospheric Geophysical and Services Administration (Pag-asa), nga karong buntag miabot na ang “mata” sa bagyo sa Eastern Visayas nga atol ning paghimo sa balita gibutang na sa signal number 4 ug ang gilapdon sa hangin moabot pa sa Mindanao ug sa Luzon.

Gibutyag ni Tabada nga ang bagyo nga Yolanda takus kaayo makabali og dagkung mga kahoy, apil na sa mga lubi ingon man makapatumba og mga balay nga dili kaayo lig-on, tungod sa gikusgon sa hangin nga subra pa sa 200 kilometros ang matag oras.

Matud ni Tabada nga kining bagyo nga Yolanda maoy giisip nga labing kusog nga bagyo sa tibuok kalibutan karong tuiga.

Si Mayor Michael Rama kanunay’ng mipahigayon og conference sa tanan niya nga mga department heads ug gihatagan og tagsa-tagsa ka katungdanan. Kadtong mga apektado sa bagyo giawhag sa pagtawag sa Incident Center sa City Hall – 412-1924.

 Mga sakop sa Local Disaster Risk-Reduction Management Office (LDRRMO) ug mga volunteers magtukaw sa City Hall aron pag-monitor sa mga panghitabo ug moresponde kun dunay manginahanglan og tabang.

 Sugod sa alas-6 kagabii, gibutang na ni Chief Supt. Danilo Constantino sa full alert status sa kapolisan ang tibuok Central Visayas ug giandam na ang tanang polis nga dunay training sa search and rescue operations.

Ang Visayan Electric Company (VECO) motuyo sa pagputol sa supply sa ilang kuryente sa mga dapit nga makasinati og lunop ingon man kun dunay mga poste nga mangatumba aron dili makahatag og peligro nga may makorentihan.

Sa laing bahin, ang kahugpongan sa mga magpapatigayon mitataw nga ang pagdagsang sa mga tawo nga namalit og pagkaon ingon man flashlights dili kini maisip nga nag-panic buying.

 Si Regan King, pangulo sa Disaster Preparedness Committee sa Cebu Chamber of Commerce and Industry (CCCI) miingon nga ang katawhan nagkadungan lang nga namalit og panginahanglanon nila atul sa bagyo.

 Mga department stores nahutdan sa ilang stocks sa flashlights samtang naglinya usab ang namalit og mga pagkaon. Bisan gani ang mga bakery usahay mahutdan sa baligya nila nga pan.

 Mga tagdumala og mga bangko mitug-an usab sa mga tinugyanan sa City Hall nga walay angay’ng kabalak-an ang mga tawo kay makakobra gihapon sila og kwarta pinaagi sa ATM kun duna la’y kuryente.

 Matud ni Atty. Jade Ponce, consultant sa mayor, nga gipasaligan sila sa mga tagdumala og bangko nga human sa bagyo mobalik ra dayon ang ilang serbisyo.

Apan kadtong dili makakobra sa mga ATM, giawhag ang mga depositor nga moadto sila sa ilang bangko diin sila magdeposito sa ilang kwarta kay bisan og may problema sa kumunikasyon makakobra gihapon sila og kwarta. (BANAT NEWS)