Lalaki gisud sa balay gipatay
CEBU, Philippines - Patay ang usa ka lalaki nga gipusil sa wala pa mailhing tawo sa sulod sa balay niini sa barangay Pansoy sa lungsod sa Sogod sa alas 8:46 sa miaging adlaw.
Ang biktima naila nga si Alfredo Pasaol, 50, minyo, molupyo sa barangay Pansoy sa lungsod sa Sogod.
Base sa imbestigasyon sa kapolisan nga usa ka sakop sa Philippine Army ang mipahibalo kanila nga may gipusil sa maong lugar.
Usa ka Sgt. Carmona ang mipahibalo pina-agi sa text message nga dunay gipusil sa barangay Pansoy.
Daling mirespondi ang kapolisan sa Sogod pinangulohan ni SPO2 Ramir Oliverio ug nakita sa mga polis nga nagbuy-od na sa yuta ang biktima.
Base sa imbestigasyon nga ang biktima nakaangkon og samad sa iyang dughan nga mao hinungdan sa iyang kamatayon diha sa ibabaw sa lantay sulod sa ilang panimalay samtang asawa niini ug anak didto sa sala.
Nakadungog na lang og buto ang asawa ug anak sa biktima duol sa gihigdaan niini ug ila na lang nakit-an nga nagbuy-od na sa yuta ang biktima.
Wala pa matino kung unsa nga armas ang gigamit sa pagpusil sa biktima tungod kay walay narekober nga kabhang duol sa crime scene. Wala pa sab matino kung kinsa ang mipusil sa biktima. (BANAT NEWS)
- Latest
