Mass evacuation gipatuman sa CV

CEBU, Philippines - Gipatuman na ang mass evacuation sa mga tawo nga gipanglantawang maagian sa super typhoon Yolanda karong adlawa.

Bag-ohay pa lang gitay-og og 7.2 magnitude nga linog ang Central Visayas ug liboan ka pamilya ang namiya gikan sa ilang mga balay ug namuyo sa mga evacuation centers ilabi na sa probinsya sa Bohol sukad pa niadtong Oktubre 15.

Apan karon subli na usab nabutang sa peligro ang mga Bisaya tungod sa bagyong Yolanda.

Sumala pa nga ang bagyong Yolanda (Haiyan) nagdala og haguros sa hangin nga lapas sa 330 kilometro (200 miles) kada oras ug gipanglantawang magdala kini og grabeng kadaot sa lapad nga bahin sa Central Visayas ug Mindanao.

"This is a very dangerous typhoon, local officials know where the vulnerable areas are and have given instructions on evacuations," sumala pa sa state weather forecaster nga si Glaiza Escullar sa Agence France Presse.

"There are not too many mountains on its path to deflect the force of impact, making it more dangerous," dugang pasabot niini.

Ang US Navy Joint Typhoon Warning Center mibutyag nga ang “Haiyan” nagdala og maximum sustained winds nga 278 kilometro kada oras ug may haguros sa hangin nga  333 kilometro kada oras.

Dili na bag-o sa Pilipinas ang mga bagyo tungod kay kada tuig maigo gyud kini kanunay og di momenus 20 ka mga bagyo, ug kadaghanan niini nagbilin gyud og mga kadaot ug daghang mga tawo ang nakalas.

Ang Haiyan maoy kinakusgang bagyo nga moigo sa Pilipinas karong tuiga ug mipasidaan ang mga tinugyanan sa lakaw sa panahon nga samtang nagkaduol kini sa Pilipinas nag-anam kini og kakusog.

Ang Yolanda gihulagway sa mga weather forecaster nga “higante” tungod sa gilapdon niini nga 600-kilometro.

Lakip sa maigo mao ang Bohol, Eastern Visayas ug Cebu. Ang Bohol ug Cebu maoy nagrabehan sa linog niadtong Oktubre 15, 2013 ug padayon pang nakasinati og mga aftershocks karong mga semanaha.

"The provincial governor has ordered local disaster officials to ensure that pre-emptive evacuations are done, both for those living in tents as well as those in flood-prone areas," matud pa ni Bohol provincial administrator Alfonso Damalerio sa AFP.

Ang National Disaster Risk Reduction and Management Council mimando na sa pagpatuman og  preemptive evacuations  ug wala nay klase sa tanang mga eskuylahan. (BANAT NEWS)