Klase sa tanang eskuylahan sa Cebu suspenso

CEBU, Philippines - Gideklarar ni Gov. Hilario Davide III nga walay klase sa tanang  ang-ang  sa  tulunghaan  sa tibuok lalawigan lakip ang  tanang   mga siyudad niini karon ug ugmang adlaw   tungod  sa   bagyo  nga Yolanda   nga  gipaabot  nga  mosulod  na  sa Philippine Area of Responsibility ( PAR) alas 5:00  sa buntag karong adlawa.

Ang  pagsuspenso  sa klase  gihimo  ni  Davide  human  siya  ug  si  Mayor  Michael  Rama gipahibawo  sa mga  kadagkoan  sa  weather  bureau  nga  peligro  ang  maong  bagyo  busa  angay  nga   mangandam  ang  tanan.

Sumala pa ni Davide   nga kabahin kini sa ilang subsob nga pagpangandam  sa pag-abot sa nahisgutang  kusog nga bagyo nga gipaabot nga morumbo sa Kabisay-an   ugma, Biyernes.

Si Davide miingon nga mas maayo nga makapahibalo daan ang iyang buhatan nga walay klase sa elementarya, high school ug college aron dili na mahago pa ang mga tinun-an ug mga magtutudlo sa pag-adto sa tulunghaan ug maapikihan   na hinuon sa bagyo.

Iyang gikabalak-an nga  ang mga tinun-an  sa layo nga lugar  maglisud  gyud ilabi  na  kadtong  molabang  pa  og  kasapaan.

Busa  tungod  sa kapeligro,  gipahibawo  na  nga karon ug  ugma  walay  klase  ang  tanang  tulunghaan  sa tibuok  lalawigan aron  dili  mamiligro  ang  kinabuhi  sa  mga  estudyante.

Samtang midugang  si  Davide  pagpahibawo  nga ang iyang buhatan ingon man ang Provincial Disaster Risk Reduction and Management uban ang  pakig-alayon sa Philippine Navy ug Philippine Coast Guard  nangandam na   usab alang sa pagpahigayon unya og rescue operations sa higayon nga motumaw ang   dagkong  baha ug pagdahili sa yuta.

Nakigtagbo na usab   ang  gobernador  sa mga miyembro sa  contractor association aron makatabang sa kagamhanan sa pagpahigayon og clearing operation sa higayon  nga may matumbang kahoy ug poste sa kadalanan o kaha sa modahili nga yuta ug mobabag sa karsada. Subsob usab niyang ipamonitor ang coastal barangay tungod kay gipaabot nga taas ang level sa dagat  inig-abot sa nahisgutang bagyo.

Sayo  niini, si Oscar  Tabada, hepe  sa Philippine  Atmospheric Geophysical  and  Astronomical  Services Administration (PAGASA)  miingon  nga ang  bagyong  Yolanda  nga  ginganlan og Hainan  sa laing  nasud,  may  gikusgon  sa  hangin  nga 150 ngadto  sa 200  kilometros  matag  takna. Apan  tungod  sa kainit  sa panahon  malagmit  molapaw  pa   sa 200 kilometros  matag  takna  ang  gikusgon  niini,  sumala  pa  ni Tabada.

Hinuon  midugang  si Tabada  nga  ang  kusog  nga  uwan  sa maong  bagyo  masinatian   sugod karong  hapon.

Sa laing bahin si  Mayor  Rama  nakigtagbo  dayon  sa mga  hepe  sa matag  departamento sa city hall  ug  matag  usa kanila  gitahasan  bahin  sa   angay  nilang  buhaton  pagtabang  sa publiko  nga  apektohan  sa maong  bagyo.

Ang  mga  heavy equipment  sa dakbayan  sa Sugbo  giandam  na  aron magamit  dayon kun adunay  mga  landslide  nga motabon  sa  mga  karsada.

Nabalaka  ang  mayor  kay  dungan  sa pag-abot  sa bagyo  lawom  usab  ang  dagat  kay  taob  man  ug gani  mosaka  kini  og  duha  ka metros  sa  baybayon.

Gimando usab  sa mayor  sa  mga  molupyo  sa daplin  sa kasapaan  sama  sa Mahiga  Creek  nga  mamalhin  ngadto  sa luwas  nga  lugar.

Samtang  gihangyo  usab  ni Rama ang  mga  tagdumala  sa pribadong  kompaniya  nga dili  nila  estriktohon  pag-ayo  ang  ilang  mga kawani  nga  mopalta  sa trabaho  karon  ug ugma  samtang  mopalig-on  sa  ilang  mga  balay  agi  og  pangandam  sa dakong  katalagman. (BANAT NEWS)