Nagluto og sud-an gipusil patay sa wa pa ilhi

CEBU, Philippines - Namatay sa tambalanan ang usa ka biyudo nga gipusil sa wala pa hiilhing tawo samtang nagluto og panihapon sa  balay niini sa barangay Tubod,  lungsod sa Sibonga sa alas 6:15 sa miaging gabii. Ang biktima naila nga si Gil Redoble, 54, biyudo, drayber, molupyo sa maong lugar.

Si PO1 Ronnie Cui nagkanayon nga ang biktima  nagluto og sud-an alang sa panihapon.  Apan matud pa ni PO1 Cui nga samtang nagluto ang biktima sa kusina, si Cherry Lyn Navarres nga kapuyo  niini  uban sa menor de edad nga anak sa biktima, nag-andam sa Christmas lights  sulod  sa balay, dihang may buto sila nga nadungog.

Daling midagan ang duha ngadto sa kusina ug mao na lay ilang nakit-an  nga nagbuy-od na ang biktima sa salog nga nagkadugo.

Daling mirespondi ang kapolisan sa balay sa biktima ug gidala pa kini sa Carcar City Provincial Hospital apan gibalhin usab dayon sa Vicente Sotto Memorial Medical Center (VSMMC) sa dakbayan  sa Sugbo. Miingon si PO1 Cui nga didto na kabsi  sa   kinabuhi ang biktima sa VSMMC  pipila  ka  takna  human  kini  mahiabot  didto.

Hangtod karon wala pa gihapoy lead ang kapolisan sa maong hitabo sanglit wala pa sila’y kasayoran kung aduna bay kaaway ang biktima.

Apan padayon ang ilang imbistigasyon sa pagsuta kun kinsa ang responsable sa maong krimen nga matud pa wala gyu’y nakakita bisan usa tungod kay ngitngit ug mingaw kaayo ang maong lugar,  matud  pa  ni  Cui. (BANAT NEWS)