Polis na-late silotan

CEBU, Philippines - Gipaubos sa pre-charge evaluation ang usa ka polis nga nadestino sa Fuente Police Station kay wala kini makatunga sa iyang assignment  atol  sa occular inspection ni Police Regional Office 7 Regional Director Danilo Constantino.

Si Constantino milibot sa mga tulunghaan sa dakbayan sa Sugbo niadtong Lunes sa buntag sa pagbukas og balik sa klase human kini isuspenso tungod sa linog. Mibisita si Constantino sa City Central School ug nasagmuyo kini dihang wala’y bisan usa  ka polis ang iyang nakita sa maong tulunghaan.

Busa iyang girekomendar nga ipaubos sa pre-charge evaluation si PO3 Ariel Dicdican sa Fuente  Police  Station nga  maoy   gidestino sa maong tulunghaan.

Si Chief Insp. Aileen Recla sa Investigation Detection and Management Branch sa Cebu City Police Office   nagkanayon nga gisumiter na sa hepe sa Fuente Police Station Chief Insp. David Señor ang resulta sa iyang kaugalingon nga imbistigasyon.  

Nasuta, sumala pa ni Recla nga na-late og duha ka oras ang maong polis sanglit gikan pa man kini sa Minglanilla.

Matud ni Recla nga para niya dili gayud igo ang maong rason nga ma-late ang maong polis.

Hinuon posibling mag-atubang og Simple Neglect of Duty ang maong polis ug matud pa ni Recla nga ilang gitun-an ang pagsuspenso sa City Hall Allowance niini sulod sa usa ka semana. Midugang si Recla nga ang jurisdiction sa pagpahamtang og silot sa maong polis naa sa iyang hepe.

Ang  balaod  mao   nga kinahanglang usa ka takna  sa wala  pa  ang  tukmang  oras  tingtrabaho , anaa na gyud unta ang polis sa iyang area of assignment. (BANAT NEWS)