Kapolisan sa Talisay nagpasalamat sa publiko

CEBU, Philippines - Nagpasalamat  sa  publiko ang kapolisan sa dakbayan sa Talisay  tungod sa ilang kooperasyon sa pagtuman sa balaud sa pagsulod  sa mga sementeryo sa siyudad.

Si Senior Inspector Al Pascual, deputy chief sa Talisay City Police Station mibutyag sa Banat News  nga malinawon  kaayo ang pagsaulog sa adlaw sa mga Santos ug Kalag sa dakbayan sa Talisay.

Hinuon matud ni Pascual nga niadtong Biyernes sa hapon  may  tulo ka tawo nga naimbargohan og mga hait nga hinagiban nga misulod sa sementeryo  sa Tanke.

Samtang   sa  pagkagabii sa maong  adlaw adunay gamay’ng lalis nga mitumaw tali sa mga mibisita  sa Cebu South Memorial Garden  sa barangay Mohon.

Matud ni Pascual nga adunay usa ka lalaking hubog ang nanguha og pagkaon nga gihalad  sa laing lubong tungod kay gigutom, hinungdan nga nasuko ang naghalad  nga  maoy  sinugdanan   sa  lalis.

Apan matud ni Pascual nga nahusay ra usab dayon kini tungod kay ang nahisgutang hubog mitanyag   nga bayaran na lang niya ang pagkaon ug nangayo usab kini og pasaylo  sa tag-iya sa pagkaon.

Hinuon matud usab ni Pascual nga gikan sayo sa buntag hangtud  sa  gabii  padayong  gi-roving  sa  kapolisan  ang  tanang  sementeryo  sa  dakbayan  ug wala  sila  makasugat  og  mga dautang hitabo.

Ang deputy   chief  sa kapolisan nagkanayon  nga  nagpasalamat sila sa publiko sa kooperasyon niini ngadto sa kapolisan pinaagi sa pagtuman sa balaud. Ang  pag-inom  og  makahubog  nga  ilimnon ug  ang  pagdala  og  mahait  nga  hinagiban  ug  pusil, pipila  sa mga  gidili  sa  adlaw  sa Kalag-kalag.

Gawas niini mapasalamaton usab ang kapolisan sa mga sakop sa Barangay Intelligence Network (BIN) sa pagtabang  kanila sa pagmentenar sa kahusay ug kalinaw. Tulo  ka shifting  ang  duty  sa kapolisan  sa  Talisay  sa maong  mga  adlaw  aron  makapahuway  sila.  (BANAT NEWS)