5 ka adlaw nga emergency leave gitugot sa CSC

CEBU, Philippines - Ang Civil Service Commission (CSC) mihatag og lima ka adlaw nga emergency leave  sa mga empleyado sa gobiyerno nga anaa sa calamity declared areas.

Sumala  sa Philippine Information Agency (PIA-7) nga  gitugotan sa CSC ang mga empleyado sa gobiyerno nga nagpuyo  sa  mga  lugar  nga  gilinog nga makapalta sa  ilang  trabaho og lima ka adlaw.

Sumala pa ni CSC Secretary Francisco Duque III nga mahimong gamiton sa maong mga trabahante ang lima ka adlaw nila nga emergency leave nga diretso  o  kaha ilak-ang   gikan sa 30 ka adlaw human sa  linog  nga  miigo  sa ilang  dapit.

Sa Central Visayas ang probinsya sa Bohol ug Sugbo maoy gideklarar ubos  sa State of Calamity tungod sa miaging 7.2 magnitude nga linog.

Dugang pa ni Duque nga ang maong emergency leave magamit aron  makapanglimpyo o kaha sa dinaliang pag-ayo sa  naguba  nga balay, na-stranded sa usa ka dapit, nasakit o nagbantay sa nagmasakit nga sakop sa pamilya ug uban pang mga rason nga may labot sa linog.

Ang lima ka adlaw nga emergency leave dili itibhang sa mga leave credits sa maong empleyado.

Gitahasan ang matag hepe  sa matag ahensya sa pagtimbang-timbang ug  pagsuta sa  aplikante  ning  maong emergency  leave.

Gigamit na ang mga resolusyon niini sa mga miaging kalamidad sama sa bagyong Ondoy. (/WC) (BANAT NEWS)