Wa magnihit ang bus, mga barko fully booked
CEBU, Philippines - Normal ang operasyon sa mga pier ug bus terminals sa siyudad sa Sugbo karon nga mamalik na ang mga pasahero sa trabaho sugod karon adlawa human sa pagsaulog sa All Saint's Day ug All Soul's Day.
Matud pa ni Glenn Sarador, Cebu Port Authority security manager nga nagsugod na og daghan ang mga pasahero nga nangabot gikan sa laing dapit or probinsiya. "Daghan na gyud ang nangabot pero mingaw ang departure," matud pa ni Sarador.
Nagkanayon si Sarador nga wala sila’y nadawat nga reklamo sama sa overloading ug overcharging, apan fully-booked gyud ang mga barko nga nangabot sa pier.
Sa Cebu South Bus Terminal, matud pa ni Julieto Flores, ang presidente sa Cebu South Mini-Buses Operators Association nga wala usab siya nakadawat og mga reklamo sama sa overcharging and overloading.
"Makita nato nga daghan ang pasahero but daghan man sad ang mga buses ug mini-buses," matud pa ni Flores.
Kahinumduman, nga ang Land Transportation Franchising and Regulatory Board-7 niluwat og special permits alang sa mga buses nga mobiyahe gawas sa ilang rota atol sa adlaw sa mga santos ug minatay.
Ang LTFRB-7 niluwat og kapin 40 ka mga special permits alang sa south ug north bound buses. Si CPA media liaison officer Karen Quiñanola-Gonzales nagkanayon usab nga sa mga pantalan sa siyudad sa Sugbo, ilaha gyud gisiguro nga convenient ang mga pasahero pinaagi sa pagbutang og taxi stands ug taxi cabs duol sa arrival areas. Gidungagan usab sa CPA ang ilang port security personnel sa mga domestic ports ug gi-activate ang passenger help desks gikan pa Oktubre 25 hangtud Nobiyembre 4. (/EIM) (BANAT NEWS)
- Latest
