Kahugaw sa sapa sa Guba ipasusi sa DENR

CEBU, Philippines - Ang mga lumulopyo sa Barangay Guba, usa ka bukirang barangay  sa dakbayan  sa Sugbo, miawhag sa Department of Environment and Natural Resources (DENR) nga susihon ang kahugaw sa ilang sapa.

Nagpatabang ang mga lumulopyo ni Konsehal Alvin Arcilla, taga Talamban, aron mapadali ang paghimo’g pakisusi sa DENR sa ilang sapa nga giingong nahugaw tungod  sa kahayopan nga gikan sa Yuvingco Farm.

Atol sa sesyon sa konseho sa dakbayan kaniadtong Miyerkules ang mga konsehal nagkauyon nga iduso sa DENR ang awhag sa mga lumolupyo sa Barangay Guba aron kahimoan dayon kini og pagtagad.

Ang mga lumulopyo nga mireklamo sa kahugaw na sa ilang sapa mipasukip pa og hulagway sa nagkagidlay na nila nga agianan sa tubig ug gikabalak-an nila nga makamugna kini og mga sakit.

Wala hinuon nila iklaro sa suwat-petisyon sa mga lumulopyo kun unsa nga  mga hayop ang gibuhi sulod sa Yuvingco Farm kansang  hugaw  anha  ra  ilabay  sa sapa.

Matud sa mga konsehal nga kun tinuod man ang pasangil nga ang hugaw sa sapa gikan sa Yuvingco Farm usa kini ka kalapasan sa balaud mao nga angayan kini nga ipasusi sa labing dali nga panahon. Ang lagda sa DENR mao nga ang mga hugaw  nga  gikan  sa  mga piggery   ug  uban  pa, kinahanglang ibutang og tangke aron dili makadaut sa panglawas sa katawhan.  (BANAT NEWS)