Buses wa magnihit, checkpoints vs overloading ibutang sa kadalanan

CEBU, Philippines - Wala magnihit ang mga bus pasaheroan kagahapon diha sa Cebu South Bus Terminal (CSBT) ug haruhay gihapong nakauli sa kalungsoran ang mga tawo alang sa Kalagkalag.

Kini sumala pa ni Vicente Dejoras Jr., ang administrador sa CSBT, kinsa mibutyag nga menus ra kaayo ang gidaghanon sa mga pasaherong midugok sa terminal kun itandi niadtong Nobiyembre 1 nga miabot og 20,000 ka tawo ang nagpaabot nga makasakay.

Ila nang napanglantawan daan nga magdasok gyud ang mga tawo sa All Saint’s ug All Soul’s Day, apan nalangay og balik ang mga bus pasaheroan tungod sa mga aberya sa mga sakyanan samtang naghinayhinay kadaghan ang mga pasaherong nagpaabot niadtong Nobiyembre 1.

Huwebes pa lang duna nay mga pasaherong nagpaabot diha sa CSBT aron makasakay sa labing sayo nga biyahe pauli sa ilang mga probinsya.

Tungod sa kakuwangon sa mga bus niadtong adlawa, mitabang ang Kapitolyo pinaagi sa pag-dispatch sa mga bus sa  Argao, Barili, Boljoon ug Talisay City  aron mahakot ang mga pasahero.

Mismong si Governor Hilario Davide III ang personal nga mihangyo sa mga mayor nga tabangan ang katawhan nga makauli sa ilang mga lungsod  nga nangatanggong diha sa CSBT.

Apan kung wala kaayo magnihit ang bus kagahapon, gipaabot nga karong adlawa ug sa adlaw nga Lunes magdasok na usab unya ang mga pasahero nga buot makabalik sa siyudad alang sa trabaho ug pagbalik sa klase.

Hinuon mipasalig ang mga bus operators nga dunay paigong mga masakyan ang mga pasahero sa ilang pagpauli karong adlawa ug ugma sa adlaw nga Lunes sumala pa ni Dejoras.

Ang Land Transportation Office ug ang Philippine National Police mipasidaan sa mga bus drivers nga dili na mo-pickup pa og pasahero diha sa dalan kung puno na sila gikan sa terminal.

Dunay mga checkpoints nga mag-atang nga bantayan sa mga sakop sa LTO ug ang kapolisan sa mga rota sa bus aron bantayan kung dunay mga pasaherong nagbarog o ba kaha overloaded tungod sa kahakog og kwarta sa mga drayber bisan nabutang sa peligro ang ilang mga kinabuhi. (BANAT NEWS)