Misukol sa polis, pusher napusilan
CEBU, Philippines - Usa ka lalaki ang napusilan ug usa usab ang nasikop sa managlahing buy bust operations sa lalawigan sa Sugbo sa miaging adlaw sa barangay Gen. Climaco sa dakbayan sa Toledo sa alas 11:45 sa miaging gabii.
Ang suspetsado naila nga si Angelito Oberes Labajo, 41, lumad nga taga barangay Gen. Climaco sa dakbayan sa Toledo City ug kasamtangang nagpuyo sa Lawaan II sa dakbayan sa Talisay.
Matud pa nga ang suspetsado mitunol sa polis nga poseur buyer sa duha ka mga pakete nga gituohang shabu bugti sa 200 pesos nga marked money.
Apan dihang gikuptan na sa polis ang kamot sa biktima aron dakpon giingong kalit kining mikuot sa iyang caliber .22 magnum black widow nga may serial number pat 4824463 nga may tulo ka buhing bala ug gition kini sa polis.
Ang polis nga nagsilbing back-up nga si PO2 Goeffrey Neis pagkakita niya nga gitionan ang iyang kauban nga polis giunhan niya kini sa pagpusil ngadto sa suspetsado. Ang suspetsado naka-angkon og samad sa iyang tuong dapi-dapi ug daling gisikop sa kapolisan ug gidala sa Toldeo City District Hospital.
Nakumpiskar gikan sa suspetsado ang buybust money, tulo ka pakete nga gituohang shabu usa ka kalibre .22 nga magnum Blackwidow ug tulo ka bala niini. Samtang nasikop sab sa buy-bust operation sa kapolisan sa lungsod sa Sogod ang usa ka lalaki sa barangay Calumbuyan sa alas 7:30 sa miaging gabii.
Ang nasikop naila nga si Jeraldine Abayan Demecillo, 32, may live-in partner, lumad nga taga 232 Belgium sa Suba-Pasil sa dakbayan sa Sugbo.
Ang nakasikop kaniya mao si PO1 Ivan Rey Davidon ug si PO1 Jade Carabuena sa buy-bust operation. (BANAT NEWS)
- Latest
