Nag-amok lima angol

CEBU, Philippines - Naghuramentado ang usa ka pilderong kandidato sa pagkakonsehal niadtong nakalabay nga barangay elections human kini ginganlan og bayot sa usa ka tomboy niadtong Sabado sa alas 2:30 sa sayo sa kaadlawon.

Ang suspetsado giila nga mao si Ronie Villaflores, 40, lumad nga taga Del Castillo Compound, Tipolo, Mandaue City. Ang mga biktima naila nga sila si Joy Abela, 34, Catherine Branzuela, Michael Urdaniza, Rosendo Avila pulos mga silingan sa suspetsado ug si Lydia Villaflores nga inahan sa suspetsado.

Matud pa ni PO1 Fredelo Quezon nga nakainom ang suspetsado sa dihang miagi sa grupo sa tomboy nga si Nina Rose Escalante, 31, silingan ra usab sa suspetsado.

Ang imbestigasyon sa kapolisan giingong gisungog sa tomboy ug sa mga kainom nga mga lalaki ang suspek ug ginganlan kining bayot.

Wala pa mokontento ang tomboy, gisundan ug gitukmod pa gyud ang suspetsado hinungdan nga gisukmag kini sa suspetsado sa baba.

Diha-diha mitabang ang mga kainom sa tomboy ug gigukod ang suspetsado kinsa daling nakasulod sa balay niini ug nakakuha og kutsilyo nga maoy gigamit niini sa pagdunggab sa miatake kaniya. Apan ang suspetsado nagkanayon nga nailog niya ang kutsilyo gikan sa usa sa mga miatake kaniya ug gigamit usab niya kini sa pagbalos sa pagdunggab sa mga tawong migukod kaniya.

Tungod sa kangitngit sa ilang lugar bisan kinsang mga tawo nga makita niya giapil niya sa pagdunggab ug naapil ang iyang kaugalingong   inahan. Ang mga biktima pulos nalandig sa tambalanan.

Ang suspetsado nga miangkon nga hubog niadtong higayona didto na nitahan sa iyang kaugalingon sa Mabolo Police Station sa Cebu City ug andam nga moatubang sa tukmang kaso nga ipasaka unya batok kaniya.

Ang suspetsado midagan sa pagkakonsehal sa barangay Tipolo sa syudad sa Mandaue niadtong barangay election sa Oktubre 28 ning tuiga apan naparot kini. (BANAT NEWS)