100 ka mga sinkholes ang natala sa Bohol

CEBU, Philippines - Ang mga kadagkuan sa Mines and Geosciences Bureau kon MGB miingon nga niabot na sa 100 ka mga sinkholes ang natala sa ilang buhatan nga nasigpatan sa mga kalungsuran sa lalawigan sa Bohol.

Kini human niigo ang 7.2 magnitude nga linog sa Bohol, Cebu ug uban pang mga lalawigan sa Central Visayas niadtong Oktubre 15 ning tuiga.

Matud pa ni MGB director Loreto Alburo ang maong gidaghanon sa mga sinkholes sa Bohol posible pang madugangan pa kini tungod sa padayong pagtay-og sa aftershocks sa maong lugar.

Si Alburo nitataw hinuon nga luwas pa puy-an ang lalawigan sa Sugbo gawas lamang sa mga lugar nga gitumbok sa mga geologists nga danger zones.

Hinuon iyang gitataw nga 200 ka mga residente sa barangay Poblacion sa Tagbilaran City ang gipabakwit  tungod sa kadelikado nga maapektohan kini sa padayon nga paghunlak sa nahisgutang mga sinkhole.

Gipasabot ni Alburo nga ang pagkahunlak sa mga yuta nga gitawag og sinkholes tungod kini sa nanggawas nga carbonic acids gikan sa ilawom sa yuta nga mohinayhinay sa paghilis sa lime stones sa ilawom sa yuta.

Dugang pa ni Alburo nga padayon karon nga giobserbahan sa ilang mga eksperto ang Bohol aron mapahimangnoan ang publiko  sa angayang buhaton. (BANAT NEWS)