Traffic light wirings gipanglarot

CEBU, Philippines - Nakugang kagahapon sa buntag ang mga traffic enforcer nga mi-report sa ilang duty diha sa may Cebu South Coastal Road habig sa eskina dalan Rabaya sa barangay Cansojong, dakbayan sa Talisay tungod kay gipanglarot na ang mga wirings sa traffic lights ug ang ilang mga bangko naa na diha gawas sa  payag-payag o traffic outpost.

Si Alecer Cataraja, 41, traffic enforcer sa siyudad kinsa maoy mi-report sa hitabo ngadto sa Talisay City Police Station mibutyag nga abli na ang ilang outpost ug ang kahon diin nahimutang ang mga wiring sa traffic light abli na usab kini ug gipanglarot ang mga wires.

Apan maayo na lang gani kay naayo dayon kini sa traffic technician ug mi-function na sa pagbalik ang traffic lights diha sa nahisgutang lugar.

Matud ni Cataraja nga dunay nakakita nga giingong usa ka tawong hubog ang misulod diha sa ilang outpost mga alas 10:00 sa gabii niadtong Huwebes.

Giingong gihuwat lang sa maong tawo ang kataposang duty nga  makalakaw na unya mipuli kini og operate sa traffic light.

Giingong ang mga residente diha sa lugar nahibulong nga nagkayabag ang siga sa traffic light apan wala nila badlonga ang maong tawo tungod sa pagtuong nag-testing kini sa mga suga sa trapiko.

Apan dihang dunay mga polis nga nag-roving nagdali og gawas sa outpost ang maong tawo apan demalas kay nabulasot sa lungag sa sawog ug sa kalagot niini gipanglabay niini ang mga bangko diha sulod sa outpost ug gipanglarot ang mga wirings sa suga.

Gibutyag usab ni Cataraja nga ikatulo na kining higayon nga  gipanglarot ang mga wirings sa traffic lights.

 Ang unang insidente nahitabo niadtong buwan sa Hulyo niining tuiga ug ang ikaduha niadtong milabay’ng buwan sa Agosto.

Si Cataraja midugang nga natahap silang residente lang sa lugar ang maong lalaki ug nanghinaot silang masikop kini. (BANAT NEWS)