Kapolisan nanghinaot way magpabadlong

CEBU, Philippines - Ang  kapolisan sa dakbayan sa Talisay nanghinaot nga  walay  magpabadlong  ning kasaulogan  sa Kalag-kalag.

Si Inspector Al Pascual, deputy chief sa Talisay City Police Station sa pakighinabi  sa Banat News kagahapon nagkanayon nga sukad kagahapon sayo sa buntag hangtud sa pagka-udto wala sila  makadakop  og  badlungon.

Matud niya nga wala sila’y nabantayan nga nagdala og mga hait nga hinagiban ug mga ilimnong makahubog  sulod sa mga sementeryo.

Ang Talisay adunay  lima ka mga sementeryo, tulo niini iya  sa  kagamhanan  nga nahimutang  sa barangay Poblacion, Cansojong ug Tanke.

Duha  usab  ang pribado nga mao ang Evergreen Memorial Garden  sa may Cebu South Coastal Road habig sa barangay San Roque ug Cebu South Memorial Garden  sa barangay Mohon.

Mabantayan sa kapolisan  sa mga publikong sam-ang ang mga manindahay og mga pagkaon, kandila, buwak, tubig ug softdrinks  sa daplin sa karsada paingon  sa sementeryo.

Apan matud ni Pascual nga normal lang kini ug pabor kini sa mga tawong magbilar  sa mga sementeryo o moduaw sa lubong sa ilang mga paryente.

Aron malikayan  ang  kasamok  sa karsada  walay gitugotan nga mga sakyanan bisan pa og motorsiklo nga mosulod  sa mga sementeryo.

Gibutyag ni Pascual nga niadtong Huwebes sa hapon aduna nay mga gipakatap nga polis sa tanang mga sementeryo ug hangtud kini karong gabii .

Ang kapolisan gibahin  sa tulo ka shifting  nga duty aron usab sila makapahuway   diin  matag shift   may walo ka oras ang duty sa mga polis.

Matud ni Pascual nga gilauman nilang  modaghan pa gyud ang mga tawong mosulod sa mga sementeryo apan gipanghinaot  nila nga unta wala lay magpabadlong o molapas sa balaod.

 Wala isalikway sa kapolisan ang posibilidad nga adunay mosulod sa mga sementeryo nga nakainom nang daan gikan sa ilang mga balay tungod kay dili man tugotan ang magdala og ilimnong makahubog  sulod sa mga sam-ang.

Ang mga sakop sa Barangay Intelligence Network mitabang usab sa kapolisan sa pagbantay  sa mga sementeryo diin  ang uban kanila  wala pasul-oba  sa ilang mga        uniporme.

Kini  tungod kay ang ilang tahas mao ang pagpaniid  sa sulod sa sementeryo kung  adunay mag-inom o magdala og ilimnong  makahubog o ba kaha magsugal ug ila dayon kining i-report ngadto sa mga polis.

Sa tulo ka mga publikong sementeryo nga maoy mga dagkung sam-ang sa siyudad ang kapolisan  adunay gibutang nga public assistance center.

Gipasabot ni Pascual nga wala na lang nila butangi og mga public assistance  desk ang mga pribadong sam-ang tungod kay diyutay lang ang mosulod ug aduna kini mga gwardiya nga maoy motabang sa mga mosulod.

Apan aduna usay mga polis nga gitahasan nga mag-roving  sa nahisgutang mga sam-ang.

Apan bisan og unsa ka busy sa pagsaulog sa adlaw sa mga Santos ug Kalag matud ni Pascual, permanente gihapong  adunay mag-roving   sa  mga  kadalanan sa siyudad ilabi na sa Tabunok.

Kini  tungod  kay  anaa  mahimutang  ang daghang mga establisamento sama sa mga bangko ug dagkung tindahan.

Dugang ni Pascual nga wala sila’y kompiyansa tungod kay posibleng ang mga badlongon mopahimus usab  sa panahon. (BANAT NEWS)