10 ka sam-ang giduaw ni Rama

CEBU, Philippines - Mibisita si Mayor  Michael Rama sa napulo ka mga sam-ang ning  dakbayan  sa Sugbo  ug  nasaksihan  niini  ang kamalinawon  sa kalihukan  sa Kalag-kalag.

Una  niyang gibisita ang sam-ang sa Pardo, A. Lopez, Calamba, Lorega, Queen City, Ludo, Carreta, Cabantan, Cempark ug kataposan niyang giadto ang Talamban.

Si  Rama nga nahinabi sa Banat News miingon nga maayo ra ang kahimtang sa mga sam-ang tungod kay may  mga  gidestinong  mga polis, mga barangay tanod, ug ang ubang mga sector nga miboluntaryo  sa pagsuporta sa kalihukan  sa kapolisan.

Gibisitahan usab sa mayor ang lubong sa mga biktima sa pagkalunod sa MV Saint Thomas Aquinas ug mihalad siya og pag-ampo alang sa  wala pa mailhi nga mga biktima. Samtang gibutangan gayud og duha ka mga tawo sa 2GO ang mga nitso sa mga biktima sa maong pagkalunod.

Matud pa ni Jubert Dubalos nga 24 oras nilang bantayan ang mga nitso sa mga biktima.

Gihalaran og mga kandila ug buwak ang matag nitso sa mga namatay.

Apan matud pa ni Dubalos nga wala pay kabanay nga mibisita sa maong mga lubong.

Matud pa ni Rama nga mibisita siya sa mga sam-ang aron masusi ang mga Police Assistance Center ug sa pag-tan-aw kun aktibo na ba ug functional kini.

 Malipayon ang mayor sa iyang nakita sa tanang mga sam-ang ug giawhag  niya  ang  pubiko nga mobisita pa  sa sementeryo nga padayonon unta ang pagsaulog sa kalag-kalag pinaagi sa usa ka malinawon, solemne ug hapsay nga pagsaulog niini.

“Let us continue to observe November 1 and 2 solemnly and peacefully much less orderly,” matud pa sa mayor. (BANAT NEWS)