Ex-convict gipusil patay

CEBU, Philippines - Patay ang usa ka lalaki nga ex-convict nga nagpaabot sa iyang igsuon dihang gipusil kini sa duha ka mga lalaki nga sakay sa motorsiklo atubangan sa Consolacion Public Market sa barangay Cansaga sa lungsod sa Consolacion sa alas 6:00 sa miaging gabii.

Ang biktima naila nga si Junril Santosidad, 24, molupyo sa sitio Ibabao, barangay Poblacion sa lungsod sa Consolacion.

Matud pa ni PO2 Julius Jimenez nga nahinabi sa Banat News nga ang biktima kuyog sa iyang higala nga naila lang sa ngalan nga “Rasib” nagpaabot sa iyang igsoon nga si Jonathan.

Samtang nagpaabot ang biktima matud pa ni Jimenez nga duha ka lalaki nga sakay sa skeleton nga motorsiklo ang kalit lang mihunong sa ilang atubangan ug mipusil sa biktima sa makadaghang higayon.

Human nahagba ang biktima sa yuta  dali usab nga nakapasirit ang mga lalaki nga nagmotor sa wala pa mahibaw-ing direksyon.

Giproklamar na nga dead on arrival ang biktima dihang nahidangat kini sa Eversely Child Sanitarium sa Mandaue City.

Si Jimenez miingon nga ang biktima nakombikto na sa kasong kalapasan sa PD 1866 as amended by RA9516 kun maghupot og armas ug matud pa nga bag-o lang gyud nakagawas ang biktima sa bilanggoan.

Miingon si Jimenez nga naalarma na usab ang maong biktima kaniadto ug girespondihan kini sa ilang kauban nga si PO1 Julius Batak apan nakigpinusilay kini.

Nakarekober ang kapolisan og usa ka kabhang sa kalibre .45 sa crime scene nga posibling maoy gigamit sa pagpusil patay sa biktima. (BANAT NEWS)