Mandaue ug Lapulapu City andam na sa Kalagkalag

CEBU, Philippines - Gipatuman sa kapolisan sa dakbayan sa Mandaue ug dakbayan sa Lapulapu ang higpit nga pagbantay sa mga sementeryo nga gidumala sa kaparian o pribado sa paghatag og kasiguroan sa mosulod ug mogawas nga mga tawo nga moduaw sa lubong sa namatay nilang mahal sa kinabuhi atol niining adlaw sa pagsaulog sa  Adlaw sa mga Santos ug Adlaw sa mga Kalag sa Nobiyembre 1 ug 2 niining tuiga. Sa dakbayan sa Mandaue si Senior Superintendent Petronile Baldebrin, direktor sa Mandaue City Police Office (MCPO) mimando sa mga presinto  sa pagdistino og mga polis sa mga sementeryo nga ubos sa ilang kaakohan. 

Naglakip sa mga sementeryo nga gibantayan sa kapolisan sa dakbayan sa Mandaue mao ang pribado ug sementeryo sa barangay Guizo nga gidumala sa kaparian sa dakbayan ug pribado.

Sa gihapon, gidili ang pagdala og mga ilimnong makahubog ug armas de fuego o hait nga mga hinagiban ug mga loud speakers sa sulod sa mga sam-ang.

Magbutang usab og assistance desk ang kapolisan sa nahisgotang mga sam-ang aron kadangpan sa mga tawo nga mangayo og panabang, duna say medical team nga mo-estambay.

Si Edwin Ermac nga maoy pangulo sa Traffic Enforcement Agency of Mandaue (TEAM) miingon nga ang mga traffic enforcer  i-deploy usab sa kadalanan.

Samtang si Senior Superintendent Rey Lyndon Lawas nga maoy direktor sa Lapulapu City Police Office (LLCP0)  nagdestino og mga polis sa mga sam-ang nga nahimutang sa Humay-Humay Gun-ob ug municipal cemetery sa barangay Poblacion ug pribadong sementeryo sa barangay Marigondon.

Wala na kinahanglana ang pagmuntar og CCTV camera sa mga sam-ang sa dakbayan sa Lapulapu matud pa ni Mayor Paz Radaza.

Matud niya daghan ang mga pulis nga ipakatap matag sam-ang ug  motabang usab ang Philippine Air Force sa seguridad maong kampante siyang walay dautang mahitabo atol sa Kalagkalag ug Adlaw sa mga Santos.

Gimando usab ni Radaza nga ablihan ang dalan sa kilid sa sam-ang katoliko sa Humayhumay aron himoong exit sa mga tawo. (BANAT NEWS)