Tulisan’ nakuhaa’g granada

CEBU, Philippines - Nagtingkagol sa Talisay City detention cell ang usa ka suspetsadong tulisan human kini masikop sa gipahigayong hot pursuit operation sa mga polis kagahapon sa kaadlawon diha sa barangay Tabunok, dakbayan sa Talisay.

Ang nasikop mao si Richie Daan, 27, taga sitio Kilawan, barangay Tanke, Talisay.

Ang mga giingong biktima sa pagpanulis ni Daan mao sila si April Cleo Luz Cañezares ug Cherick Kim Mediano parehong hingkod ang panuigon ug mga residente diha sa barangay Poblacion, Talisay.

Nadala sa tulisan gikan kang Cañezares ang usa ka kolor pink nga pitaka nga dunay sulod nga P4,800 nga kwarta ug usa ka silver nga bracelet nga nagkantidad og P2,500.

Samtang usa ka cellular phone nga nagkantidad og P9,000 ang nakuha sa tulisan gikan kang Mediano.

Si Senior Inspector Al Pascual uban nila ni SPO1 Mikie Espina, SPO1 Yvonne Ilustrisimo, PO1 Edwin Campomanes ug PO1 Stephen Sefuesca maoy nakasikop sa suspetsado samtang nagduwa kini og electronic game sa barangay Tabunok.

Na-recover sa mga polis gikan sa suspetsado ang usa ka hand grenade, usa ka cellular phone ug P605 nga kwarta.

Si Espina nga nahinabi sa Banat News mibutyag nga si Daan nadakpan na nila kini sa milabay’ng mga buwan niining tuiga tungod sa pagdala-dala niini og pusil nga walay  lisensiya.

Matud usab ni Espina nga si Daan giingong nalambigit usab kini sa mga insidente sa pagpanulis sa siyudad.  Ang suspetsado duna na kini hulagway diha sa kapolisan sa ilang mga nadakpan nga nalambigit og mga krimen.

Gibutyag ni Espina nga ang hulagway ni Daan maoy gitudlo sa duha ka mga biktima nga maoy mitulis kanila.

Kagahapon sa buntag si Daan gipasakaan na kini og kasong illegal possession of explosive ug two counts of robbery diha sa piskaliya sa Talisay. (BANAT NEWS)