Rama mokiha sa BFP
CEBU, Philippines - Ang kagamhanan sa dakbayan sa Sugbo mapugos sa pagpasaka og kaso sa hukmanan aron
mopahawa ang Bureau of Fire Protection (BFP) gikan sa ilang opisina nga gamiton ni Mayor Michael Rama isip temporaryo nga ospital.
Si Mayor Rama mitahas ni Vice Mayor Edgardo Labella nga maoy moasikaso sa maong isyu aron mopahawa na ang mga bombero sa ilang nahimutangan aron dili na sila makasamok sa mga pasyente. Sa buwag nga interview sa Banat News, si Labella nagkanayon nga huwaton niya ang 15 ka adlaw gikan sa paghatag nila sa “notice†ngadto sa BFP nga nag-awhag kanila nga mobiya sa ilang nahimutangan.
Gipasabot ni Labella nga bisan pa og ang Bureau of Fire Protection maoy tag-iya sa building nga ilang gigamit sa Natalio Bacalso Avenue, apan ang dakbayan may katungod sa pagpahawa kanila kay gamiton na man sa dakbayan ang yuta nga gitarukan sa building. Matud ni Labella nga mura’g walay kontrata nga gipirmahan ang dakbayan ug ang kadagkoan sa kabomberohan bahin sa paggamit sa maong lote sa atbang sa Cebu City Medical Center.
Nasayran nga ang Bureau of Fire Protection nga gipangulohan ni Regional Director Ma. Luisa Hadjula nagdumili pagbiya sa ilang opisina bisan kun may kamandoan gikan sa mayor nga adto una sila mobalhin sa Cebu City Sports Center.
Matud ni Rama nga angay’ng sulbaron kining maong isyu sa hukmanan aron mahibaw-an kinsa kanila ang adunay rason.
“Ayaw g’yud ko nila’g hagita. Kun gusto sila’g war, dili ko mosibog,†matud sa masuk-anong mayor dihang nasayud nga hangtud karon nagmagahi ang kabomberohan sa pagbiya sa ilang building.
Ang building sa BFP buot ipagamit sa mayor nga temporaryo nga ospital kay ipaguba man niya ang CCMC human ikataho nga grabe ang kadaut niini tungod sa pagkaigo sa kusog nga linog kaniadtong Oktubre 15. – (BANAT NEWS)
- Latest
