Aussie ambassador mitunol og hinabang sa Cebu ug Bohol

CEBU, Philippines - Mibisita sa Police Regional Office 7 ang Ambassador sa Australia nga si Ambassador Bill Tweddell kagahapon sa buntag ug gidawat kini ni Sr. Supt. Rey Batiancela.

Gibisita usab ni Tweddell ang mga lugar nga naapektahan sa linog sa Sugbo ug sa Bohol lakip na ang Basilica Minore del Santo Niño diin naguba ang kampanaryo niini. Ang kagamhanan sa nasud sa Australia mihatag og donasyon sa tunga-tungang kabisay-an nga naapektahan sa linog. Si Tweddell ug PRO7 director Danilo Constantino uban sa directorial staff nag-meeting kagahapon.

Gikataho nga mikabat og 124 milyones ka pesos ang donasyon sa nasud sa Australia lakip na niini ang 44 milyones nga balor sa mga family survival kit ug mga bugas.

Ang mga survival kits naglakip na sa mga sleeping mats, mosquito nets, ug sudlanan sa tubig. Apil sa maong donasyon ang pundo alang sa pagbangon sa Bohol sama sa pagpatukod og balay, paghatag og patubig.

Matud pa sa taho sa Philippine Information Agency, ang ambassador nagkanayon nga ang Bohol ug ang gobyerno sa Australia duna nay partnership sulod sa 20 ka tuig. (BANAT NEWS)