Reporter gikulata sa mga taga Comelec
CEBU, Philippines - Nahiagom og mga bun-og sa kalawasan ang usa ka reporter sa DYSS -RGMA Cebu human kini gikulata sa mga job order employees sa buhatan sa Commission on Election COMELEC sa dakbayan sa Mandaue kagahapon sa buntag.
Matud pa ni Norman Mendoza reporter sa DYSS-RGMA Cebu mga alas 9:30 kagahapon sa buntag nangayo siya sa resulta sa mga midaug nga kandidato sa barangay sa dakbayan sa Mandaue diha sa buhatan sa Comelec-Mandaue.
Apan giingong gibalibaran siya kay wala pa daw mahuman.
Tungod niini nagka-komprontase si Mendoza ug pipila ka mga kawani sa Comelec hangtud nga mibiya siya sa maong buhatan apan giingong gigukod siya ni Edgar Lumapas nga miresulta sa ilang sinukmagay.
Apan giingong dunay duha ka mga kauban ni Lumapas nga mikupot kang Mendoza ug diha na gitabangan kini og kulata. Ang duha gidala sa presinto sa kapolisan ug didto gihusay.
Ang mga tigbalita ug mga sakop sa Comelec lakip na ang kapolisan nagpulaw sa pagbantay sa eskutenyo niadtong milabay’ng gabii.
Diha sa police station giingong nagkasabot ang duha nga magpinasayloay na lang ug namirma nga dili na magkihaay. (BANAT NEWS)
- Latest
