Asturias mihinabang ‘sab sa Bohol

CEBU, Philippines - Ang lungsod sa Asturias sa probinsya sa Sugbo mihatag og tag P50,000  nga pinansyal nga hinabang  sa matag  usa  sa upat ka lungsod sa probinsya sa Bohol nga  nasabak  sa linog  sa miaging  semana.

Ang  makadawat  sa maong  hinabang  mao  ang  mga  lungsod  sa  Maribojoc, Loon, Sagbayan ug Inabanga.

Matud pa ni Asturias Information Officer Mark Supatan nga ang Municipal Disaster Risk Reduction Management (MDRRMC) nagkauyon nga magpadala sila  og hinabang  ngadto sa maong  mga  lungsod. Kini   human nila  maila nga  seryosong nadaot  sa  linog nga  may  gikusgong  7.2 magnitude ang  maong  mga  lugar.

Dugang pa ni Supatan nga ang tagsa-tagsa ka munisipalidad makadawat og P50,000 nga gikuha gikan sa 30 porsento nga Quick Response Fund .

Ang lungsod sa Asturias anaa mahimutang sa amihanang-kasadpan nga bahin sa probinsya sa Sugbo sa ika- tulong distrito.

Usa kini sa swerteng lungsod nga wala gayud makadawat og dakong kadaot sa miaging kusog nga linog. (BANAT NEWS)