Don Durano pildi og 15 ka boto

CEBU, Philippines - Gipahibawo ni Vice Gov. Agnes Magpale nga napildi lang og 15 botos ang kanhi mayor sa siyudad sa Danao nga si Don Durano sa pagka-barangay kapitan sa barangay Poblacion  sa maong  dakbayan.

Suma pa ni Magpale nga ang mga Durano mipaluyo unta kang Don  batok ni Calvin Tuadles anak sa kanhi PBA basketball player nga  si Arnolfo Arnie Tuadles.

Ang bise gobernador wala nakatuo sa pagkapilde ni Don Durano   kay  ang  Poblacion,  balwarte  man sa mga Durano.

Si Magpale wala hinuon makakuha og tukmang  figure sa tanang boto  ni Tuadles ug Don Durano  kay ang mga dokumento  tua  pa man  sa Comelec. Sigun sa iyang nahibaw-an nga ang kampo ni Don Durano  mihangyo   sa pag-ihap og balik  sa  mga balota. Apan ang resulta mitug-an  gayud nga 15 botos  ang labaw ni Tuadles.

Wala hinuon makasiguro ang bise gobernador kun moduso  ba og election protest si Don Durano  bahin  sa iyang  kapildihan

Samtang  sa Subangdaku,  dakbayan  sa Mandaue midaug  gihapon  si kapitan Ernie  Manatad batok  sa  iyang  kaatbang  nga  si Walter Ati Dy.

Si Manatad  mao  usab  ang  presidente  sa pederasyon  sa liga  sa mga  barangay o Association  of Barangay  Council (ABC) ug naglingkod  isip  ex-officio  member  sa konseho  sa dakbayan  sa Mandaue.

Ang  laing  mga  kapitan  nga  nasublian  usab  mao  si Nelson Rubio sa barangay Umapad, Barcelisa Ouano Icalina  sa  barangay  Opao, Malaquias Soco  sa barangay  Paknaan ,   Carmelito  Delmar sa  Ibabao-Estancia.

Dionesio  Villamor  sa Bakilid, Oscar dela Castillo  sa Casuntingan, Francis Tan  sa Maguikay, Edesa Montesa  sa Jagobiao, Jesus  Arcelia  sa Tawason, Leo Jabas  sa Canduman, Maria Thelma Sanchez sa Cambaro, Antonio Maquilan sa Mantuyong, ug  Mayang Sanchez  sa Alang-Alang.

Samtang  ang  mga  kanhi  kapitan  nga  milansar pagbalik  human  mopahuway  kay  natapos  sa tulo  ka termino  ug  midaug  sa eleksyon  niadtong  Oktubre 28, mao sila si Renato Suson  sa Labogon, Randy Pareja sa Tingob.

Cynthia Remedio sa Cabancalan, Asterio Suson  sa Pagsabungan, Almario Bihag sa Cubacub, Cesar Sol Cabahug Jr., Jesus Neri sa Guizo, Ignacio Cortes sa Centro  ug Greg Yap sa Banilad.

Sa barangay Sirao, dakbayan  sa Sugbo, nasublian  usab  ang incumbent  nga kapitan  nga  si Felix Limotan batok kang Jesus Bontuyan Jr.

Ang  mga  midaug  nga  konsehal  mao  sila  si Flaviano Gabunada Jr., Pedy Rebonza, Rolando Villaban, Sucan Arcilla, Reyman Englis, Abeth Velayo ug Bobby Quijano. (BANAT NEWS)