Tanod gisikop kay armas niini way lisensya
CEBU, Philippines - Gisikop sa kapolisan ang usa ka sakop sa Barangay Public Safety Officer (BPSO) o barangay tanod tungod sa pagtangkil og armas de fuego nga walay lisensya didto sa barangay Casili, dakbayan sa Mandaue kagahapon sa alas 12:00 pasado sa tungang gabii.
Si PO3 Arnold Villacampo sa kapolisan sa Presinto 6 sa Mandaue City Police Office (MCPO) nga nagbase sa barangay Canduman miila sa nadakpan nga mao si Jonathan Mapula, 47, minyo ug sakop sa BPSO sa barangay Casili .
Matud pa ni PO3 Villacampo nga nahinabi sa Banat News nga ilang nadawat ang tawag sa telepono bahin sa panaglalis sa mga tigpaluyo sa nagkaatbang nga mga kandidato. Pag-abot nila sa maong dapit may mitug-an kanila kalabot sa suspek nga nagdala og armas.
Si PO3 Villacampo miingon nga ilang girekisa ang suspek ug ilang nasakmit ang kalibre 45 uban sa magazine nga may pito ka mga buhing bala .
Dugang pa ni PO3 Villacampo nga ilang gipangayoan si Mapula og lisensiya, ug pagtugot gikan sa Commission on Election ug uban pang papeles apan napakyas kini sa pagpakita.
Hinungdan matud pa ni PO3 Villacampo nga ilang gidakop ug gibalhog sa bilanggoan ug mag-atubang kini og kaso nga paglapas sa Comelec gun ban. (/WC) (BANAT NEWS)
- Latest
