Bohol nagki-nahanglan pa og tabang medical

CEBU, Philippines - Gisubli ni Gobernador Edgar Chatto sa probinsya sa Bohol ang  pamahayag  nga hangtod karon nanginahanglan pa gayud sila og medikal nga hinabang.

Kini giklaro sa gobernador agi og pagkoreher  sa miaging mga report  nga  ang Bohol   wala na manginahanglan og tabang  sa mga doktor, medical teams ug uban pang medical practitioners alang sa ilang rehabilitasyon.

“We would like to correct the erroneous news because even up to this present time Bohol is actually in need of medical assistance from medical teams in the rehabilitation state of the province,” kini dugang pa ni Chatto.

Si Chatto mihangyo  sa tanang interesadong medical group nga makig-alayon una ngadto sa operation  center  sa Provincial Health Office (PHO)  alang sa gikinahanglang schedule ug mga venue. Nagkanayon ang gobernador nga adunay dugang ipanghatud nga mga suplay nga tambal  ngadto sa mga dapit nga gibakwitan sa mga biktima sa linog.

Subay niini si Provincial Health Officer Dr. Rey Moses Cabagnot miingon usab nga ang mga biktima sa linog nga anaa karon sa mga nagkalain-laing evacuation centers nanginahanglan gayud og medikal nga suporta. 

Sumala pa ni Cabagnot nga ang PHO mipunting  sa pagpalig-on sa panglawas gikan sa mga  mananakod nga sakit nga gipaabot  gikan sa mga evacuation centers.

Apan giklaro ni Cabagnot nga wala’y gikatahong outbreak sa  nagkalainlaing  balatian  sa mga apektadong dapit. (BANAT NEWS)