Moore gipetisyonan nga ma-disqualify

CEBU, Philippines - Peligrong matagak sa iyang kandidatora   ang  usa  ka kandidato sa barangay Ibo, dakbayan  sa Lapulapu gumikan  sa petisyon  nga  gipasaka  sa iyang  kaatbang  pagkanselar  sa certificate of candidacy (COC)  niini.

Ang  petisyon  ni Mary Jane A. Cahilog, batok  kang Gleceria Booc Moore, pulos  hingkod ug  minyo,  nga  pulos  kandidata  sa pagka-kapitan  sa barangay  Ibo,  nadawat  sa Commission on Elections (Comelec)-Manila  sa miaging Oktubre 22, 2013.

 Pipila  sa  mga  rason nga  gisingit  ni Cahilog sa iyang  petisyon  mao  ang kapakyas ni Moore  sa pagtug-an  sa tinuod  niyang  pinuy-anan, tinuod  nga gidugayon  sa iyang  pagpuyo, ug ang tinuod niyang pagka-lungsoranon o citizenship.

Gitumbok  ni Cahilog  sa iyang petisyon nga  si Moore wala’y  balay  ug  mga kabtangan  sa barangay  Ibo  kay  ang  balay  nga  gipuy-an  niini  tua man sa barangay Buaya, dakbayan  sa Lapulapu.

Wala usab  siya  makatuman sa usa ka tuig  nga  gipangayo  sa  usa  ka kandidato o botante  nga  gidugayon  sa pagpuyo  niini  sa  usa  ka dapit  diin  siya mokandidato  o kaha  moboto.

Ang  ika-tulo  mao  nga  dili na siya Filipino citizen kay  ang  nasuwat  sa iyang  passport “USA” ang iyang citizenship.

Busa sa maong  petisyon ni Cahilog  kansang  kopya gipahat  sa Banat News, mihangyo  kini  sa Comelec  nga  kanselahon  ang  iyang  COC  ug  i-disqualify  kini  sa iyang  kandidatora tungod  sa dili  niya  pagtug-an  sa tinuod.  (BANAT NEWS)