Polis mipusil sa igsuon tungod sa selos

CEBU, Philippines - Usa ka lalaki ang gipusil sa iyang igsuong polis tungod sa selos sa sitio San Roque sa barangay Mambaling sa dakbayan sa Sugbo pasado alas 8:00 sa miaging gabii.

Ang biktima naila nga si Farouk Hamis, 50, molupyo sa sitio San Roque sa barangay Mambaling sa dakbayan sa Sugbo.

Samtang ang suspetsado naila nga si SPO3 Rashid Hamis, nadestino sa Cebu City Public Safety Company sa Cebu City Police Office.

Matud pa ni SPO1 Ruth Violango sa Homicide Section nga nagselos ang suspetsado sa iyang igsoon tungod kay nagtuo kini nga dunay relasyon ang iyang asawa ug ang biktima.

Sumala pa ni Violango nga nakig-settle na unta ang biktima kuyog sa iyang asawa aron makig-areglo sa suspetsado apan nasuko na an hinoon kini ug gipusil ang iyang igsoon sa makaduha ka higayon.

Naka-angkon og samad ang biktima sa iyang walang tiil ug daling gidala ngadto sa Visayas Community Hospital.

Human sa maong hitabo mitahan ra usab sa iyang kaugalingon sa mga sakop sa Motorcycle Riding Unit ang suspek ug gitahan ang iyang kalibre .45 nga pistola nga may upat ka bala ug narekober sa kapolisan ang duha sa kabhang diha sa nahitaboan.

Ang hepe sa Investigation Detection and Management Branch sa Cebu City Police Office Chief Insp. Aileen Recla miingon nga kung mo-expire na ang reglamentary period ilang buhian ang suspetsado tungod kay giingong dili mopasaka og kasong kriminal ang igsoon niini.

Apan bisan pa man niini, ikostudiya sa CCPO ang suspek tungod sa kasong administratiba nga ilang ipasaka nga grave misconduct diha sa Internal Affairs Service (IAS).

Kung mapamatud-an nga dunay kalapasan ang suspetsado posible kini nga masuspenso o matangtang sa serbisyo. (BANAT NEWS)