Lumod nga patay midunggo sa Cansojong

CEBU, Philippines - Naukay kagahapon sa buntag ang mga residente  daplin sa baybayon sa barangay Cansojong, dakbayan sa Talisay tungod sa usa ka dolphin o lumod nga midagsa nga patay na.

Si Bernardo Parame sa Fishermen Sea and Ecological Care (FISECA) sa dakbayan sa Talisay nga nahinabi sa Banat News  mibutyag nga niadtong Biyernes sa hapon ang maong lumod nakit-an pa sa usa ka mananagat nga si Ricardo Sagaysay, 20, residente sa barangay Tanke  sa mabaw nga bahin sa dagat sa ilang barangay.

Matud ni Parame nga si Sagaysay daling mi-report ngadto sa barangay hall sa Tanke bahin sa maong dolphin.

Giingong gipabalik ngadto sa lawod ang maong isda  ug giabyan kini ni Sagaysay apan kagahapon sa buntag nahibulong na lang ang mga residente  sa barangay Cansojong.

Kini  tungod  kay  gitapok-an sa mga langgam nga Kanaway ug gitabangan og tuhak ang  maong  isda  nga wala  nay  kinabuhi.

  Matud ni Parame nga gikompirma ni Sagaysay nga ang nahisgutang lumod mao ang iyang nakit-an ug gihatud ngadto sa lawod.

Midugang  siya   nga sa  pagkahibawo  nila  sa maong  taho  ila  kining  gisusi  ug mitawag sa taga Bureau of Fisheries and Aquatic Resources.

Gibutyag ni Parame nga ang nahisgutang lumod   may samad sa ikog, ulo ug silik niini.

Daling giablihan sa taga BFAR ang tiyan sa maong isda ug gikuhaan kini og sample aron masuta ang hinungdan sa kamatayon niini.

Human makuhai og sample ang maong isda gilubong kini sa mga sakop sa FISECA.  (BANAT NEWS)