Giluba sa gikainom angol

CEBU, Philippines - Angol ang usa  ka batan-ong lalaki nga gidunggab sa iyang gikainom didto sa sitio Sacs, barangay Buaya, dakbayan sa Lapulapu sa miaging gabii.

Ang biktima mao si Miguelito Chan, 23, ulitawo nga lumad nga taga lalawigan sa Samar ug temporaryong nagpuyo sa barangay Babag I  sa maong dakbayan.

Ang suspetsado nga gikainom sa biktima  nailhan lamang sa angga nga Tintin, wala hisayri ang  address kinsa dali usab nga nakapahilayo sa maong dapit. Si PO1  Jomar Florentino sa homicide section sa kapolisan sa maong dakbayan nga nahinabi sa Banat News miingon nga nagkahinagbo ang duha sa usa ka tindahan  ug nagkasabot nga mag-inom.

Sa paglabay sa pipila ka oras  wala  damha nga ilang nahisgotan ang miagi nga panghitabo nilang  duha nga  misangko sa  usa ka lalis.

Matud pa ni PO1  Florentino   nga wala makaagwanta ang suspetsado   ug miibot  kini  sa iyang    Batangas knife ug giluba ang biktima.

Dugang pa ni PO1 Florentino nga dughan unta ang puntariya sa maong pagdunggab apan nakahupo ang biktima  busa   ang iyang nawong maoy  naigo.

Dali  kini  gihatud  ngadto sa  Vicente Sotto Medical Center sa dakbayan sa Sugbo.

Si PO1 Florentino miingon nga human sa maong pagdunggab ang suspetsado dali nga mipahilayo  ug wala na kini maabti sa kapolisan.

Hinuon  padayon  nila  kining  gipangita. (BANAT NEWS)