Kapolisan sa Talisay gi-briefing alang sa election

CEBU, Philippines - Gipaubos sa briefing kagahapon sa buntag ang kapolisan sa dakbayan sa Talisay agi og pangandam sa eleksiyon sa barangay ugma, Lunes.

Si Senior Inspector Al Pascual, deputy chief  sa Talisay City Police Station mibutyag sa Banat News nga gihatagan  na  sila  og  tagsa-tagsa  ka destino  nga lugar.

Matud ni Pascual nga nakig-alayon  kanila   ang election officer sa siyudad bahin sa ilang preparasyon  ug aron usab makahibawo sila sa mga polling precinct.

Ang Talisay  adunay  22 ka  barangay diin duha niini mao ang barangay Dumlog ug Poblacion nga giusa o clustered ang polling place.

Ang  Talisay City Central School maoy botohanan   sa barangay Poblacion.

Ang Dumlog ug Poblacion tapad  nga  mga barangay.

Gibutyag ni Pascual nga upat ka mga police personnel ang ibutang sa nahisgutang polling place.

Matud sa deputy  chief nga ang tanan nilang gimbuhaton alang sa eleksiyon plantsado na, ug sa alas 12:00  unya  sa tungang gabii ang tanang police personnel gimanduan kining mo-report alang sa final briefing ug instructions.

Ang kapolisan magbutang usab og police assistance center  sa mga dagkung polling place aron hapsay ang dagan sa pagbotar ug adunay makatabang o makaaksiyon dayon sa mga problema nga motumaw.

Lakip sa maglangkub sa dagkung polling place mao ang Poblacion, Tabunok  ug San Roque.

Ang kapolisan  adunay gitukod usab  nga reaction team ug ang mga barangay gibahin ngadto sa duha ka sektor.

Sa unang sektor kinsa si Pascual maoy team leader gilangkuban   sa Poblacion, Cansojong, Tanke, Candulawan, San Roque, San Isidro, Tabunok, Bulacao, Biasong, Pooc, Mohon ug Dumlog.

Sa ikaduhang sektor kinsa si Inspector Rodgene Fodutan ang team leader gilangkuban  sa Jaclupan, Lagtang, Lawaan I, II ug III, Linao, Maghaway, Campo 4 ug 6, Manipis ug Tapul.

Ang mga  gidestino  sa maong mga lugar gimanduan   nga mohatag og report pinaagi sa text matag oras ngadto sa operation center aron mahibaw-an ang dagan sa eleksiyon.

Ug kung  adunay mga kasamok nga mahitabo ang action team moresponde dayon kini. Apan bisan og unsa ka ukopado sa eleksiyon matud ni Pascual nga nanagana na silang posibleng molihok ang mga badlongon aron magpahimos sa higayon.

Matud ni Pascual nga aduna gihapoy mga beat patrol ug mobile patrol nga magpatrolya sa kadalanan sa siyudad panahon sa eleksiyon. (BANAT NEWS)