City hall in Taptap giduaw ni Rama

CEBU, Philippines - Gisusi personal ni Mayor Michael Rama ang City Hall  in Taptap,  nga  tua  sa  bukid nga bahin sa dakbayan sa Sugbo, ang  barangay Taptap.

Ang usa ka building nga iya sa Cremdec kon City Resource Management Development Center maoy gigamit isip City Hall in Taptap diin adto ang mga kawani magbasi.

Gipasabot ni Rama nga ang pagbutang niya sa City Hall in Taptap gitumong aron kadtong mga taga barangay sa kabukirang bahin sa dakbayan nga adunay tuyo sa City Hall, dili na maghago paglugsong sa downtown area.

Ang City Hall in Taptap distinohan og mga kawani sa lainlaing departamento sa kagamhanan sa dakbayan aron maoy moatiman sa panginahanglan sa mga taga bukid.

Ang mga dukomento ug mga reklamo nga madawat sa mga kawani nga gidistino sa City Hall in Taptap dad-on nila sa main office sa mao nga mga departamento.

Matud ni Rama nga pinaagi niining iyang proyekto makadaginot ang mga lumulopyo sa bukid ug dili na maghago ingon man makagasto sa dagko nga pletehan paglugsong sa dakbayan ug pagbalik sa ilang barangay.

Si Mayor Rama mitagana unta og kapin sa usa ka milyon ka pesos alang sa pagmugna og City Hall Extention building sa Barangay Taptap sa budget karong tuiga, apan wala kini aprobahi sa konseho tungod kay nagtuo sila nga dili makakuha’g budget si Rama sa maong proyekto.

Karong tuiga, ang konseho miaprobar lang og P5.2 Bilyones sa kinatibuk-ang P6.7 Bilyones nga budget nga giduso ni Rama.

Hangtud sa miaging Septiyembre 30, ang kinatibuk-ang nakolekta nga buhis ug ubang revenues sa dakbayan miabot pa lang og P3.9 Bilyones.

Ang mayor misugyot na usab og P10.4 Bilyones nga budget para sa tuig 2014 apan gi-review pa kini sa Committee on Budget and Finance sa konseho. – Rene U. Borromeo/WC

SSS office abli  matag  Sabado

Gipahibawo  sa  buhatan  sa Social Security System (SSS)  nga  bukas sila karong adlawa Sabado, Oktubre 26.

Si Donald Montecillo, tigpamaba  sa SSS  nagkanayon  nga  ila na  kining  himoon  matag Sabado aron  maatiman  ang  mga aplikasyon sa mga membro nga mopahimulos sa calamity release package tungod kay nabiktima  sa linog.

Dawaton usab sa ilang buhatan ang dugang pang mga transaction sama sa renewal sa salary loan sa mga membro ug niadtong buot mobayad sa ilang mga loan.

Matud pa ni Montecillo nga ang pagbukas sa ilang buhatan matag Sabado gituyo  aron madawat usab ang mga transaction sa mga membro sa SSS nga wala maatiman tungod kay nagtrabaho gikan sa Lunes hangtud sa Biyernes.

Giklaro ni Montecillo nga  dili lamang ang main office sa SSS maoy moabli sa adlaw nga Sabado kun di  lakip na ang mga satellite office niini sa Mandaue, Lapu-lapu, Toledo ug sa Bogo city.

Midugang  siya  nga ang pagbukas sa ilang buhatan molanat  kutob  sa  Disyembre ning tuiga.( /WC) (BANAT NEWS)