The Freeman Foundation ug Operation Damayan mitabang sa Bohol

CEBU, Philippines - Human sa katalagman nga miigo sa Central Visayas makita ang espiritu sa pagtinabangay sa mga Filipino ug nagtambayayong pagtabang sa mga nabiktima bisan unsa pa kalisud ang sitwasyon.

Niining ulahi lang ang probinsiya sa Bohol maoy labing naapektohan sa nahitabong linog niadtong milabay’ng Martes.

Ang The Freeman Foundation ug ang Philippines Star lakip sa mga mipaabot og hinabang ngadto sa mga naapektohan sa linog.

Si Melandro “Bhoy” Mendoza, general manager sa The Freeman ug Banat News Publications mibutyag nga human sa linog niadtong Miyerkules ang foundation nagpasiugda dayon og pagpanawat og mga hinabang alang sa mga biktima.

Gibutyag ni Mendoza nga samtang wala pay nadawat nga donasyon niadtong higayona, ang The Freeman Foundation mipasiuna kini og pagawas og budget alang sa mga pagkaon nga gipamutos nga gilangkuban sa duha ka kilong bugas, tulo ka latang sardinas ug lima ka putos nga mga noodles.

Matud ni Mendoza nga 300 ka mga packs ang naputos nila alang sa 300 ka mga pamilya samtang ang The Freeman Newspaper  mihatag usab kini og 50 packs alang usab sa 50 ka mga pamilya.

Ang mga kawani sa The Freeman ug Banat News  nag-amotay ug nakatigom og P38,600 ug gidugang sa pagpamalit og relief goods. Gibutyag ni Mendoza nga kagahapon gi-upgrade nila ang gidaghanon sa mga sulod sa packs tungod kay ubay-ubay na usab ang mihatag og donasyon usa na niini ang Cebu City Hall kinsa mihatag og 99 ka mga karton nga sardinas.

Kagahapon gihimong lima ka latang sardinas, duha ka kilong bugas ug lima ka putos nga noodles ang gisulod sa packs.

Mikabat sa 623 ka mga packs sukad kagahapon ang naputos sa staff sa administration sa The Freeman/Banat News.

Samtang ang ‘Operation Damayan” sa Philippine Star nga kaubang publication sa The Freeman nakigtambayayong usab sa The Freeman ug midonar sila og 700 ka baldeng mga biskwit ug napulo ka karton nga instant coffee.

Apan bisan og mihatag na kini og donasyon sa The Freeman,  ang Philippine Star Operation Damayan mihatag usab kini og linaing hinabang alang sa mga biktima sa Bohol.

Gibutyag ni Sir Bhoy nga ang mga hinabang gikan sa Philippine Star Operation Damayan diri gipaagi sa The Freeman sa Cebu tungod kay maglisud kini sa pagpadala direkta gikan sa Manila padung sa Bohol.

Niadtong Miyerkules, ang The Freeman/Banat News mibiyahe paingon ngadto sa Bohol diin dala ang mga hinabang gikan sa Operation Damayan.

Ang maong mga hinabang naglangkob kini sa 700 ka balding biskwit, 3,000 ka mga habol ug 90 ka karton nga instant coffee.

Matud ni Mendoza nga ang maong mga donasyon gisakay nila sa barko sa  Lite Shipping ug nagpasalamat siya tungod kay ang gipabayaran sa maong shipping company handling fee lamang sa ilang gidalang mga donasyon apan ang mga tawo nagbayad sila og pamasahe.

Si Sir Bhoy nalipay usab kini tungod kay ang Bohol dealer sa The Freeman ug Banat News nga ang magtiayong Ferdinand ug Alma Mercado sa Tagbilaran mitugot nga maoy pundohan sa mga hinabang.

“Doon lang ang bagsak, ginawa nating warehouse ang bahay nila for free,” ni Sir Bhoy pa. Karong Lunes gikatakdang mobiyahe na usab si Sir Bhoy uban sa administration staff balik ngadto sa Bohol aron dad-on ang dugang mga hinabang gikan sa The Freeman.

Matud ni Sir Bhoy nga direkta silang moadto sa isla sa Panggangan, lungsod sa Calape ug sila mismo maoy moapod-apod sa mga pack direkta ngadto sa 625 ka mga pamilyang biktima sa linog ngadto sa nahisgutang lugar.

Gibutyag ni Sir Bhoy nga duna nay tawo nga gisangonan nga mo-scout sa lugar ug manghatag og mga coupon aron inig-panghatag sa hinabang dili kini magsamok.

Gipasabot ni Sir Bhoy nga wala na lang sila moagi sa lokal nga kagamhanan sa lugar paglikay nga dunay motumaw nga isyu kabahin sa politika ilabi na karon nga duol na ang eleksiyon sa barangay.

Ang The Freeman/Banat News manawat og hinabang kutob karong Oktubre 30, 2013. Ang mga matigom nga hinabang pwede kining ipundo unya ipa-apod-apod usab kini ini’g ka Pasko.

 Gihulagway ni Sir Bhoy ang nakita niyang kapait sa sitwasyon sa atong mga kaigsuonan ngadto sa Bohol nga nabiktima sa linog diin matud niya “emosyon ang kalaban mo na di ka maiyak.”

Dugang sa GM sa The Freeman/Banat News nga bisan unsa kalisod wala sila batia og kakapoy  tungod kay tumong nila mao ang pagtabang “wala ang hirap pag-gusto mong tumulong,” ni Sir Bhoy pa. (BANAT NEWS)