Gidudahang kawatan gipusil patay sa bugoy-bugoy sa Tabunok

CEBU, Philippines - Usa ka gidudahang kawatan ang gipusil patay niadtong Miyerkules sa gabii diha sa sitio Molave Extension, barangay Tabunok, dakbayan sa Talisay sa iyang kaatraso nga giingong bugoy-bugoy usab diha sa ilang lugar.

Ang biktima giila sa kapolisan nga si Jomar Cabatuan alyas “Gaga” taga sitio Mananga 2, Tabunok nakaangkon og usa ka samad pinusilan sa walang bahin sa iyang dughan ug  wala na makaabot nga buhi ngadto sa Talisay City District Hospital.

Samtang ang suspetsado giila nga si Junbert Abrenica, residente usab sa barangay Tabunok ang daling misibat human sa maong hitabo ug padayon pa kining gipangita sa mga polis.

Si Senior Insp. Al Pascual uban nila ni SPO1 Mikie Espina ug PO1 Edwin Campomanes ang miresponde sa maong insidente.

Si Espina nga nahinabi sa Banat News kagahapon mibutyag nga ang suspetsado ug biktima duna kini personal nga bangi ug dugay nang nagdumot ang suspek niini.

Giingong gisakyan sa suspek ang traysikad sa biktima ug gidiretso kini og pusil, matud pa ni Espina nga nakadawat sila og report nga si Cabatuan giingong nalambigit og mga kaso  sa pagpangawat diha sa ilang lugar samtang si Abrenica giingong bugoy-bugoy sa ilang lugar. Ang kapolisan padayon sa ilang hot pursuit operation batok sa suspetsado. (Brenda D. Batuto/EIM)

P.Noy natulog sa tent uban sa mga evacuees

Giduyogan ni Presidente Benigno Aquino III ang mga Boholano ug gikauban nila sila sa pagtulog sa tulda diha sa evacuation site sa lungsod sa Loon sa miaging gabii atol sa iyang pagduaw niadtong Miyerkules sa hapon.

Liboan ka mga biktima sa linog ang nagpuyo karon sa mga evacuation sites sa Bohol tungod sa kahadlok sa mga aftershocks nga mitala na og kapin sa dos mil base sa talaan sa Philippine Institute of Volcanology and Seismology (PhiVolcs).

Matud pa nga kataposang nakatulog ang pangulo og tent dihang nag-eskuyla pa kini sa elementarya sumala pa sa report sa GMA News.Tv.

"Medyo parang na-experience natin ulit noong panahon ng boy scout na camping," sumala pa sa presidente sa mga tigbalita. Ang presidente natulog sa teheras sa Philippine Army.

Nabatyagan usab sa pangulo ang aftershock nianang pagka-alas 3 sa kaadlawon, apan matud pa niya, mura lang siya og nagbakasyon.

Matud pa nga gituyo sa presidente nga di matulog sa mas haruhay nga hotel aron ma-experience niya og personal ang gibating kalisod sa mga Boholano ning mga panahona.

Si Aquino nang apud-apod og mga relief goods  sa mga residente ug miduaw sa uban pang mga dapit nga naigo sa linog. Gipasaligan sa presidente ang katawhan nga dunay paigong suplay sa hinabang alang kanila ug gimando niya ang dinaliang aksyon aron mabalik sa normal ang kinabuhi sa mga biktima,

Kagahapon, giduaw ni Aquino ang Sagbayan nga silingang lungsod sa Loon aron masusi ang epicenter sa linog ug iyang nakita ang grabeng kadaot nga gibilin niini.

Matud pa sa presidente nga dunay P20-bilyones nga savings ang gobiyerno nga mahimong ipagawas alang sa dinaliang pagbalik sa kabaskog sa Bohol. (BANAT NEWS)