Mga polis nga gipadala sa Zamboanga mahimo nang makabalik dinhi

CEBU, Philippines - Gikatakdang mamalik na dinhi sa Central Visayas ang 130 ka mga sakop sa Regional Public Safety Battalion (RPSB) -7 nga gipadala didto sa Zamboanga City human mosugot ang Camp Crame sa hangyo sa Police Regional Office (PRO)-7. Matud pa nga misuwat si Sr. Supt. Erson Digal, chief of the Regional Operations and Plans Division ngadto sa Crame aron papaulion na dinhi ang maong mga polis tungod sa nagsingabot ang eleksyon sa sunod semana.

Sumala pa ni Digal ang masakyan na lang nga C-130 transport plane sa Armed Forces of the Philippines ang ilang gipaabot nga maaprubahan aron ihatud sila dinhi sa Sugbu.

Naglaom ang PRO-7 nga mabalik sila sa dili pa ang eleksyon karon adlaw nga Lunes aron dunay reserbang polis.

Hinuon si Deputy Regional Director for Administration, Chief Supt. Generoso Cerbo miingon nga kung dili gyud sila makaabot sa barangay elections paigoon nila ang kasamtangang pwersa nga nia sa rehiyon aron bantayan ang eleksyon. Sa pagkakaron duna lang kini 4,668 ka mga sakop nga pwedeng magamit aron bantayan ang 2,910 ka mga polling centers. (BANAT NEWS)