Nang-hostage napusilan patay

CEBU, Philippines - Patay ang usa ka opisyal sa barko human kini giingong nang-hostage sa usa ka 13-anyos nga dalagitang pasahero sa laing barko sa kompanyang iyang gialagaran kagabii diha sa Pier Uno sa Cebu City.

Ang napusilan patay mao si 2nd Mate Andrew Lendio nga opisyal sa MV Pilipinas-Butuan, samtang nalandig sa tambalanan ang 13-anyos nga iyang gi-hostage nga tinun-an sa Sisters of Mary Academy sa Talisay City ug pasahero sa MV Filipinas-Cebu nga padung sa Bacolod City.

Matud pa sa Ship Nurse sa M/V Filipinas -Cebu nga si Joel Malaubang nga maoy usa sa mihatud sa bata ngadto sa Vicente Sotto Memorial Medical Center nga nainterbyu sa mga reporters, ang bata naigo sa bala sa ubos sa walang ilong ug miungot sa tuong liog niini.

Sumala pa sa imbestigasyon sa kapolisan nga ang napatay nagdagan-dagan sa pier ug misaka sa maong barko ug mi-hostage sa 13- anyos nga bata.

Matud pa sa mga kauban sa 13-anyos nga bata nga nagdinaganay na sila dihang misaka sa sun deck si Lendio ug gibunlot ang biktima nga nagtambo sa railings.

Si Chief Insp. Wildemar Tiu, hepe sa Waterfront Police Station sa pakighinabi sa mga tigbalita nagkanayon nga naatol nga diha sa pikas barko nga MV Filipinas Butuan ang duha ka polis nga sila si SPO4 Rogelio Cañete ug si PO1 Henry Alejandrino nga nadestino sa Station 10 tungod kay duna sila’y gipasakay nga pasahero.

Miingon si Tiu nga pagkakita sa duha ka polis nga nabutang na sa peligro ang kinabuhi sa bata maong gipusil na lang ni Cañete si Lendio.

“That is his call nakita na niya nga naa na sa imminent danger ang hostage mao ‘toy judgment call sa polis immediately he needs to respond,” sumala pa ni Tiu.

Si Cañete matud pa ni Tiu, mi-report na sa CCPO ug gi-surrender ang iyang armas.

Matud pa ni Sister Marinel Sauza sa Sisters of Mary School nga tungod sa deklarasyon nga walay klase gipabakasyon nila ang mga stay-in nga mga bata.

Gikompirmar sa Vice President for Fleet Operations ug Human Resource Manager nga si Chase Cokaliong sa pamahayag nga iyang giluwatan sa The Freeman/Banat News, nga empleyado nila si Lendio.

Midugang si Cokaliong nga off-duty pa si Lendio nianang tungora ug ang mga kauban niini miingon nga mi-report sa MV Filipinas-Butuan si Lendio alas 6:02 apan nakabantay sila nga nakainom kini.

Matud pa niya nga kung dunay naka-report kanila bahin sa gihimo ni Lendio kasagaran duna sila’y internal investigation nga himuon. Nagtuo si Cokaliong nga posibleng dunay personal nga problema ang suspek.

Duna na sila’y gihimong kaugalingong imbestigasyon sa maong hitabo.

Gipahibalo usab ni Cokaliong nga ilang abagahon ang galastohanan sa bata sa tambalanan.

Si Marites Paller ang half-sister sa suspetsado miingon sa mga tigbalita nga walay problema ang suspetsado gani mitawag man ang asawa niini nga atoa sa Canada nga wala sila mag-away.

 Ang asawa sa suspetsado tulo na ka tuig nga nagtrabaho sa Canada ug mouli unta karong Disyembre 5. (BANAT NEWS)