Hinabang sa mga biktima sa linog nagbaha

CEBU, Philippines - Dugang hinabang  sa mga biktima sa linog sa lalawigan  sa Bohol ang padayong gitanyag  sa mga ahensya sa goberno ug   sa  pribadong sektor. Kini samtang  nasud-ong ang  hilabihan  kadaghang  mga  pinutos  nga  pagkaon  ang  nadawat na sa mga  biktima  sa maong lalawigan.

Matud pa ni Semeon Remata III, usa sa mga tigpamaba sa Department of Social Welfare and Development sa Central Visayas (DSWD-7), nga sa milabay’ng lima ka adlaw, ang DSWD ug ang Bohol Provincial Government miapod-apod na og 87,157 ka pinutos  nga mga pagkaon nga nagkantidad og P21 milyones.

Dugang pa ni Remata nga ang matag pakete nga pagkaon nagkantidad usab og P250 nga gilangkuban sa tulo ka kilo nga bugas ug walo ka nagkalain-laing de lata nga pagkaon.

Ang matag  putos  igo gayud alang sa duha ka adlaw nga konsumo sa pamilyang adunay lima ka miyembro.

Midugang  si Remata nga ang maong pinutos nga pagkaon gipang-apod-apod  ngadto sa mga biktima nga pamilya  sa sulod ug gawas sa evacuation centers.

Nagkanayon si Remata nga niadtong Oktubre 21 ning tuiga sa alas 6:00 sa buntag, adunay 64 ka evacuation centers sa probinsya sa Bohol ang  natukod  nga  nahimutang sa 25 ka mga lungsod.

Ang maong  mga  lugar nagusbat  pag-ayo  sa linog  nga kasagaran niini anaa mahimutang sa kasadpang bahin sa maong probinsya. Nakasilbi  ang  DSWD og  20,014 ka mga pamilya o 98,573 ka indibidwal.

Sumala pa ni Remata nga mikabat  ang  kinatibuk-an og 52,850 ka pamilya  o 242,883 ka indibidwal ang kasamtangang nagpuyo   sa  gawas sa  mga  evacuation centers.

Gibutyag   usab ni Remata nga sa probinsya sa Sugbo, ang DSWD Field Office 7 nagpadayon pa sa pag-repack og mga relief goods.

Gani  miingon  siya  nga  mokabat  sa   10,000 ka family packs matag adlaw ang kinahanglang mahatod ngadto sa probinsya sa Bohol  pinaagi sa Philippine Air Force (PAF) C-130, Philippine Coast Guard (PCG) ug uban pang komersyal nga sakayan sama sa 2Go. (BANAT NEWS)