Order sa suspension ni Cabahug nadawat sa DILG

CEBU, Philippines - Nadawat na  sa buhatan  sa lokal  nga  kagamhanan kaniadtong  Oktubre 7, 2013 ang  mando  sa  pagsuspenso  ni  Konsehal Editha  Cabahug sa dakbayan  sa Mandaue  nga giluwatan  ni   Judge Raphael  Yrastorza Sr.

Si  Mandaue City  DILG Director Jhoaden Lucero nga nahinabi sa Banat News  sa miaging adlaw nagkanayon  nga igo  lang   gipahibawo  sa korte ang  DILG kalabot  sa pagsuspenso og 60 diyas  kang  Cabahug.

Apan  midugang  si Lucero  nga  walay  labot  ang  DILG  sa pagpatuman  sa maong suspension kay  iya  kini  sa korte.

Hinuon  giklaro ni  Lucero nga ang preventive suspension nga giluwatan sa korte dili  maisip nga silot sa  kaso ni Cabahug nga graft and  corruption.

Ang  tumong  niining  suspension   mao ang paglikay nga  maka-empluwensiya  si Cabahug kun magpabilin siya  isip  opisyal sa kagamhanan.

Ang  kaso  nahimo  dihang  si  Looc barangay Konsehal Jesus Flores  mipasaka  og kiha batok kang Konsehal Cabahug kinsa mokubra  unta sa iyang terminal  leave benefits isip kapitan sa barangay Looc niadtong   tuig nga wala pa ipa-epekto ang  joint circular  No. 1 series  sa tuig  2004 sa Civil Service Commission (CSC) ug Department of Budget and Management (DBM) .

Kini  may  labot  sa  mga leave benefits sa mga barangay officials.

Si  Carmela Fernan sa Department of Budget and Management (DBM) Region7  nagkanayon nga ang Joint Circular sa DBM mi-epekto  na kaniadtong Hulyo 19, 2004. (BANAT NEWS)