Cordova may 324 ka kandidato sa brgy.

CEBU, Philippines - Mikabat  sa  324 ka mga kandidato alang sa pagka opisyal sa barangay  sa lungsod sa Cordova alang  sa  election sa Oktubre 28.

Kini  gikan  sa  13 ka mga barangay sa maong lungsod.

Si  Alvin Maghanoy, municipal election officer sa Cordova mibutyag    sa Banat News  nga adunay mga barangay sa maong lungsod nga init  kaayo  ang  kombati sa mga konsehal.

Kini tungod  sa  pagka way  kontra  sa ilang mga  kapitan.

Naglakip sa mga kandidato  sa pagka-kapitan sa  barangay nga walay kontra  mao ang  sa barangay  Alegria, apan 14  ang kandidato alang sa pagka konsehal.

Gisundan kini sa barangay Buagsing nga wala gihapoy kontra  ang magpasubli nga kapitan apan 11 usab ang kandidato sa pagka konsehal.   

Ang barangay Dapitan wala  gihapoy  kontra ang kapitan nga magpasubli sa katungdanan apan siyam ang kandidato alang sa pagka konsehal.

Ang barangay Bangbang  nga adunay duha ka mga kapitan  nga nag-atbang,  19 usab ang kandidato  sa pagka barangay konsehal, upat ang nag-atbang nga kandidato sa pagka kapitan didto sa barangay Catarman  ug 27 usab ang kandidato alang sa pagka barangay konsehal.

Samtang sa barangay Gabi nga adunay duha ka mga kandidato  sa pagka barangay kapitan, 14 usab ang kandidato alang sa pagka barangay konsehal.

Ang barangay Hilutungan nga adunay upat ka mga kandidato nga barangay kapitan,  22 usab ka mga kandidato sa pagka- barangay konsehal.

Sa barangay Pilipog nga adunay duha ka mga kandidato nga barangay kapitan, adunay  13 ka mga kandidato sa pagka barangay konsehal .

Sa  barangay Ibabao nga adunay duha ka mga kandidato sa pagka barangay kapitan,  16 ka mga kandidato alang sa pagka konsehal ang  magtigi.

Si Maghanoy miingon nga sa matag barangay  mopili lamang og usa ka barangay kapitan ug pito ka mga barangay konsehal ang  mga botante. (BANAT NEWS)