Firewall sa Gothong Memorial National High School kuyaw mahagsa sa kabalayan

CEBU, Philippines - Gimando ni Cebu City Mayor Michael Rama ang dinalian nga pagpaguba sa pader nga semento nga nagsilbi nga firewall sa Gothong Memorial National High School dapit sa dalan J.M. Basa diha sa barangay San Nicolas-Proper.

Ang maong firewall nagbahirig na tungod sa linog nga nasinati dinhi sa Sugbo kaniadtong Martes sa miaging semana. Kun matumba ug malukapa ang maong firewall, sigurado nga dunay mga sakop sa pito ka pamilya nga nagpuyo sa ubos nga madat-ogan.

Ang Gothong Memorial National High School building maoy gigamit kaniadto nga high school department sa Cebu Institute of Technology (CIT) apan gipalit kini sa pamilya’ng Gothong ug gidonar sa kagamhanan.

Human makita sa personal ni Rama ang nagkalainlaing mga tunghaan kagahapon, iya dayon nga gimandoan ang tagdumala sa City Disaster-Risk Reduction Management Council nga gub-on dayon ang maong pader.

Gipasaligan sa mayor ang mga nagpuyo sa gagmay’ng barung-barong sa ubos nga bahin nga ang dakbayan motabang kanila pagpabarog pagbalik sa ilang panimalay nga maguba kun mahugnoan sa pader.

Didto sa San Nicolas Elementary School sa dalan Carlock nakit-an ni Rama ang gihulagway niya nga dakung binuang pagtukod sa school building nga wala butangi og hagdan.

Gisaway ni Rama ang kanhi nagdumala sa city school board nga posible nga nakig-alayon sa contractor sa school building aron makaangkon og daku-daku nga ginansya.

Ang duha ka andana nga school building gibutangan lang og hagdan nga gikonektar sa katupad nga tunghaan.

Matud sa mayor nga kadtong maong hagdan maoy tabangan sa pag-agi sa mga tinun-an kun adunay emerhensya ug sigurado nga makamugna kini og aksidente.(/EIM) (BANAT NEWS)