Talisay gipaubos sa state of calamity

CEBU, Philippines - Ang dakbayan sa Talisay gipaubos  sa state of calamity pinasikad sa resolusyon nga giaprobahan  sa konseho atol sa ilang special session sa miaging Sabado.

Kini  sa tinguha  nga magamit na sa siyudad ang calamity fund  alang  sa mga pamilyang naapektohan sa kusog kaayong linog niadtong Martes.

Base sa consolidated report sa Local Disaster Risk Reduction Management Council (LDRRMC) niadtong Oktubre 16, 2013 usa ang patay  sa barangay San Isidro ug duha ang angol, laing duha ang angol  sa barangay Lagtang, usa sa barangay San Roque ug laing usa usab sa barangay Tanke.

Siyam ka mga lawak   nga  klasehanan nga karaan  na  kaayo  sa Bulacao Elementary School ang nangaguba.

Tulo ka mga balay ang nangaguba didto sa sitio Tiguib, barangay Lagtang human kini maligiri og mga bato.

May 63 ka mga pamilya gikan sa sitio Tiguib ang namakwit sa kabalaka nga matabunan sa yuta. Gawas niini 66 usab ka pamilya sa sitio Sambagan ug 80 ka pamilya sa sitio San Rafael pulos sa barangay Tanke ug 150 sa barangay San Roque.

Nunot niini si Mayor Johnny De los Reyes miawhag sa social welfare sa 22 ka mga barangay sa siyudad nga mo-report ngadto sa iyang buhatan bahin sa ilang assessment sa nahitabong kadaot sa linog. (/WC) (BANAT NEWS)