Mga Bol-anon mopahibawo sa ilang mayor sa mga kadaot — PNOY

CEBU, Philippines - Giawhag ni Presidente Benigno ‘Noynoy’ Aquino III sa mga Bol-anon nga ipahibalo dayon sa ilang mga mayor kun may mabantayan silang kadaot sama sa mga liki sa estraktura sa ilang mga lugar human sa 7.2 nga linog nga nitay-og sa maong lalawigan niadtong Martes, Oktubre 15.

“Ipaalam agad ninyo sa inyong LGU at patingnan kung may duda kayo o kung may mapansin kayong cracks. Ituro ninyo sa ating mga imbestigador,” matud pa sa Presidente atol sa pakigpulong sa mga ahensiya sa gobyerno didto sa lalawigan niadtong Miyerkules.

Gitumbok sa Presidente nga gikinahanglan kaayo  kini aron mahatagan og pagtagad sa  mga tinugyanan  sa  gobiyerno ang mga  kadaot  sa  mga  estraktura  sa maong  lugar.

Gimanduan sa Presidente ang Department of Public Work and Highways (DPWH) nga makig-alayon sa Provincial Engineering Office aron masiguro nga tanang mga estraktura masusi gayud og maayo tungod kay  may   mga aftershocks pa  nga padayon pa  sa pagtay-og sa maong  lalawigan.

Ang   labing bag-ong Building Code niadto pang 2010 nga gipatuman karon, nagtakda og kalig-onon sa  mga bag-ong estraktura nga dili maguba kun adunay linog nga 7.2 ang gikusgon, sumala   pa sa Presidente.

Matud pa sa Presidente nga problema gyud tinuod  ang  mga  karaang  estraktura apan kinahanglang  adunay sumbanan nga gitawag nga “retrofitting” aron makatuman  sa gitakda  sa Building Code  alang  sa  kaluwasan  sa kinabuhi  ug  kabtangan.(Liezl Mabini Frasno/WC)

Cortes hospital sa Mandaue gitak-opan

Ang  Don Ignacio Cortes General Hospital  sa dalan Sotero Cabahug ,sa barangay Ibabao sa dakbayan sa Mandaue  temporaryong gitak-opan tungod sa mga  kadaut sa edipisyo niini  human  sa linog  niadtong  Martes.

Kini ang nasayran sa Banat News kang Konsehal Jimmy Lumapas sa konseho sa maong dakbayan nga nahinabi sa Banat News kagahapon.

Matud pa niya nga hinuon nagpabilin ang naandan nga operasyon sa upat ka tambalanan sa maong dakbayan nga naglakip na niini ang Mandaue City Hospital sa sitio Tribunal sa barangay Centro, Seamens Hospital sa barangay Umapad, Eversely Child Sanitarium General Hospital sa barangay Jagobiao ug Vicente Gullas Memorial Hospital sa barangay Banilad sa maong dakbayan.

Dugang pa ni Konsehal Lumapas nga ang pagtak-op sa  60 ka katre  nga tambalanan  maoy  pagtuman sa mga  mando sa mga structural consultant nga  misusi sa kahimtang sa  maong edipisyo human sa  linog .

Si Angie Amaquin nga maoy administrative officer sa maong tambalanan nga nahinabi sa mga tigbalita miingon nga lima sa ilang mga pasyente ang  gibalhin ngadto sa pribadong tambalanan  sa dakbayan sa Sugbo ug ang uban kanila  gipapauli na.

Dugang pa ni Amaquin nga kasamtangan silang  nagpadayon  sa  pagpanawat  sa mga pasyente nga gusto lamang nga magpa-check-up. (BANAT NEWS)