Talisay mamalit og heavy equipment

CEBU, Philippines -  Human sa linog niadtong Martes ang kagamhanan sa dakbayan sa Talisay nagplano sa pagpalit og mga  heavy equipment truck nga  magamit  sa  panahon sa emerhensiya.

Kini  dihang  nasud-ong  sa  kagamhanan  ni Kapitan Marieta “Yeyen” Bucao sa barangay  San Isidro  sa maong  dakbayan  nga  nanghuwam og boom  truck  sa pribadong establisamento aron makuha ang dakung  tipak sa semento nga midat-og sa usa ka van ug sa pagluwas sa mga sakay niini.

Sa maong  hitabo, usa ang patay ug laing duha ang naangol dihang ang maong van nga nagparking tungod sa usa ka residential building nga gipanag-iya sa pamilyang Tan sa barangay San Isidro napusa human mahagsa-i sa beam nga semento sa maong edipisyo. Si Bucao mapasalamaton kaayo sa mga pribadong establisamento nga  mitabang  kaniya  sa pag-ugkat sa mga biktima.

Matud ni Bucao nga ipadangat  niya ngadto kang Mayor Johnny De los Reyes nga unta ang siyudad mogahin og pundo nga ikapalit og mga heavy equipment  tungod kay gikinahanglan kini sa siyudad.

Si De los Reyes nga nahinabi sa mga tigbalita nagkanayon nga  ang  siyudad  mogahin  og  budget  nga  ikapalit  og boom truck ug crane.

Matud sa mayor nga dili angayang magsalig sa mga pribadong  kompaniya  tungod  kay  dili  matagna  ang  panahon  sa  pagkinahanglan  niini.

Gibutyag ni De los Reyes nga sa pagkakaron ang siyudad adunay  backhoe ug mga dump truck nga gamiton og hakot-hakot ilabi na kung mag-abuno sa mga karsada.

Apan sa panahon sa emerhensiya sama sa nahitabong linog dili magsilbi ang maong mga ekipo sa siyudad tungod kay gagmay ra kini,  matud ni  De los Reyes. (BANAT NEWS)