UV mohinabang sa taga Cebu ug Bohol

CEBU, Philippines - Ang University of the  Visayas (UV) miawhag sa iyang  mga alumni,  faculty, staff, estudyante ug sa tanang  Sugboanon sa pagtabang  sa  mga  nabiktima sa linog sa Cebu ug Bohol pinaagi  sa Visayanian Tabang  sa Cebu ug Bohol.

Matud pa ni UV Executive Vice President Jose”Dodong” R. Gullas nga kabahin  na  sa kultura  sa Universidad ang  pagtunol og hinabang  niadtong  nagkinahanglan  niini. “Mihinabang  kita  sa atong mga kaigsoonan  didto  sa  Guinsaogun sa Leyte, Cagayan de Oro City, ug sa Guihulngan, Negros Oriental. Karon panahon na  usab  nga  motabang  kita  sa  atong kaigsoonan  sa Cebu ug sa  mga silingan natong Boholano”, matud pa  niya.

Sugod karong  adlawa, Oktubre 19, ang UV main campus  sa Colon ug ang  Gullas Medical Center sa Banilad modawat na  og  mga donasyon sa binotelyang tubig, linatang  pagkaon  ug uban  pang  makaon dayon. (/WC) (BANAT NEWS)