Supply sa tubig sa Dalaguete apektado

CEBU, Philippines - Kagamhanang lokal sa lungsod sa Dalaguete nabalaka nga mosaka ang mga water borne diseases tungod sa kadaot sa tanan nga water system sa maong lungsod nga mokabat og P5 milyones ang danyos niini.

Matud sa Municipal Administrator sa Dalaguete nga si Rydel Cisnero nga nahinabi sa Banat News halos ang tanang tinubdan sa tubig sa maong lungsod pwerting luboga.

Miingon si Cisnero nga nahugno ang upat ka portion sa tubo nga gikan sa mainline   human sa linog kagahapon. Apan matud pa ni Cisnero nga ang tinubdan sa ilang tubig nagagikan sa Dinaayoc Cave sa barangay Obo sa lungsod sa Dalaguete.

Miingon si Cisnero nga ang tubo nangaputol human sa linog nga nahimutang sa bakilid nga bahin sa sitio Dibdib sa barangay Sacsac. 

Gibana-bana nga mokabat sa duha ka semana usa pa maayo ang maong mga tubo ug nahadlok si Cisnero nga posibling mokatap ang mga water borne diseases sa ilang lungsod.

Busa iyang gipahibalo ang Dept. of Health kalabot sa kahimtang sa ilang lungsod.

Miingon si Cisnero nga sagad sa mga tinubdan lakip na sa tabay, tubod og mga sapa lubog kaayo og mora og tsokolate ug dili gyud makalosan og tubig.

Ang water system sab sa barangay Nalhob sa samang lungsod nahubsan sab ang reservoir niini. Si Cisnero miingon nga dakong kadaot ang naangkon sa lungsod sa Dalaguete apan kontrolado na kini.

“We are trying to be on top of the situation, we’re trying to manage,” matod pa ni Cisnero. (BANAT NEWS)