2 patay 1 angol sa pagpamusil

CEBU, Philippines - Duha ka mga lalaki ang namatay ug usa ang angol sa pagpamusil nga nahitabo sa managlahing lugar sa dakbayan sa Sugbo kagahapon. Ang mga  namatay mao sila si   Giovani Canillo, 30, nagpuyo sa B. Aranas Extension apan lumad nga taga-Sawang Calero, Jelemar Bergantin, 27, nga taga Unit 2, barangay Opra, pulos  sa dakbayan  sa Sugbo.

Samtang a ng  naangol  mao  si  Enrique Solis, 24,taga Sudlon, barangay  Lahug, dakbayan  usab sa Sugbo.

Matud pa sa live-in partner ni Canillo, nga si Jonarlyn Gonzaga, 23, nga nahinabi sa Banat News nga nanglaba siya dihang nakadungog siya og buto  sa armas  de fuego. Nasayran  na lang  niya  nga  gipusil patay  ang iyang bana  human  kini  niya makita ug  iya  kining gigakos   nga  nagkadugo pa  ug  human  mosangpit  sa iyang  ngalan nga Lyn,  nabugto usab  ang kinabuhi  niini.

Samtang si Bergantin  ug si Solis nagbarug  sa daplin  sa  karsada  dihang  gipamusil sila    sa backrider  sa motorsiklong mihunong  sa ilang  atubangan . Sumala  ni SPO4 Alex Dacua  nga  nabulit  sa mga  samad pinusilan si Bergantin samtang  giingong napagan  lang  sa maong  hitabo si Solis, kay  si Bergantin  ang  target  sa mga kriminal.  Si Solis  nakaangkon  usab  og  mga  samad  pinusilan sa iyang  tuong  kilid, abaga ug  buko-buko  ug  nadala siya  sa tambalanan. (BANAT NEWS)